استاناداعى سۋ تاپشىلىعى: قالا اكىمدىگى ساياجاي يەلەرىنە ۇندەۋ جاسادى
«قالا حالقىنىڭ سانى ارتىپ، قۇرىلىستىڭ كوبەيۋىنە بايلانىستى «استانا سۋ ارناسى» كاسىپورنى اۋىز سۋ وندىرىسىندە قيىندىقتار سەزىنىپ جاتىر. سونىڭ سالدارىنان 2023 -جىلدىڭ 28-ناۋرىزىندا سۋ قىسىمىن رەتتەۋ باعىتىندا شارالار قابىلداپ، سۋ بەرۋدىڭ كەستەسىن بەلگىلەۋگە ءماجبۇر بولدى.
ونىڭ ۇستىنە جاسىل جەلەك پەن باۋ- باقشا سۋاراتىن سۋدىڭ ۇلەسى كەڭ. وسىعان بايلانىستى وتكەن دەمالىس كۇندەرى كوپشىلىگىڭىز سۋ بەرۋدە شەكتەۋ بولعانىن سەزىندىڭىز.
قازىرگى تاڭدا بۇكىل ساياجاي يەلەرىن بەلگىلەنگەن ۋاقىتتى قاتاڭ ۇستانۋدى، سۋارۋ جۇمىستارىن ساعات 23.00-دەن باستاپ 6.00-گە دەيىن جۇرگىزۋدى سۇرايمىز» ، - دەلىنگەن تاراتىلعان حابارلامادا.
ال بۇل ۋاقىتتا سۋارۋ قولايسىز دەپ ەسەپتەيتىن تۇرعىندارعا تەحنيكالىق سۋدى ساتىپ الۋ ۇسىنىلىپ وتىر. ونى ساتىپ الۋعا بولاتىن مەكەنجايلار دا كورسەتىلگەن:
1. ك و س، قورعالجىڭ تاسجولى كوشەسى، 47
2. كوكتال كوشەسى، 1. «تۇلپار» ات كلۋبىنىڭ اۋدانى
3. الاش تاسجولى، اۆتوماتيكا ك ن س-28
4. جانسۇگىر ۇلى كوشەسى، 7
5. ع. مۇستافين جانە قوبىلاندى باتىر كوشەلەرىنىڭ قيىلىسى.
سونداي- اق مەكەمە وكىلدەرى تۇرعىن ءۇي كەشەندەرىندە سۋ قىسىمى ازايعانى بايقالسا، ۇيگە قىزمەت كورسەتەتىن كومپانيالارعا جۇگىنىپ، سۋ سوراتىن سورعىلاردىڭ امبەباپ قىسىم دەڭگەيىن رەتكە كەلتىرۋدى سۇراۋ كەرەكتىگىن ايتىپ وتىر.
«قالىپتاسقان جاعدايدا ۇيدەگى تۇرمىستىق جۇمىستاردى اپتانىڭ جۇمىس كۇندەرىنە جوسپارلاۋ ۇسىنىلادى. بۇل اسىرەسە دەمالىس كۇندەرى قاربالاس ساعاتتاردا سۋ قۇبىرى جۇيەسىنە تۇسەتىن سالماقتى جەڭىلدەتەدى.
ۋاقىتشا قابىلدانىپ جاتقان شارالار جاڭا سورعى- ءسۇزۋ ستانساسى ىسكە قوسىلعانعا دەيىن جالعاساتىنىن ايتا كەتەيىك. ستانسا قۇرىلىسى 2021 -جىلى باستالعان بولاتىن. ونىڭ قۋاتى تاۋلىگىنە 105 مىڭ تەكشە مەتر سۋدى سۇزۋگە جەتەدى. بۇل بۇكىل قالاعا بەرىلەتىن سۋدىڭ كولەمىن ۇلعايتۋعا مۇمكىندىك بەرەدى. بۇل نىساننىڭ قۇرىلىسىن الداعى جىلدارى اياقتاۋ جوسپارلانعان.
سۋ بەرۋمەن بايلانىستى تۋىنداعان ۋاقىتشا قولايسىزدىقتار ءۇشىن كەشىرىم وتىنەمىز جانە قالىپتاسقان جاعدايعا تۇسىنىستىكپەن قاراۋدى سۇرايمىز» ، - دەلىنگەن رەسمي مالىمەتتە.
