بالاسىن جازعى دەمالىس لاگەرىنە جىبەرەتىن اتا- انالار نەنى ءبىلۋى ءتيىس

«جازعى دەمالىس جاقىنداعان سايىن اتا- انالار بالالارىنا جازعى ساۋىقتىرۋ لاگەرلەرىن ىزدەي باستايدى. قازىرگى ۋاقىتتا ينتەرنەت جەلىسىندە لاگەرلەر تۋرالى اقپارات وتە كوپ. بۇل رەتتە قالانىڭ سانيتاريالىق دارىگەرلەرى بالالارىنا جازعى دەمالىسى ءۇشىن لاگەر ىزدەگەن اتا- انالارعا نازار اۋداراتىن بىرنەشە كەڭەستى ۇسىنادى» ، - دەلىنەدى قالالىق سانيتاريالىق- ەپيدەميولوگيالىق باقىلاۋ دەپارتامەنتىنىڭ حابارلاماسىندا.

سونىمەن، اتا- انالار لاگەرلەردىڭ قانداي باستى تالاپتارىنا ءمان بەرگەنى دۇرىس.

سانەپيدەم باقىلاۋ دەپارتامەنتىنىڭ مالىمەتىنشە، بىرىنشىدەن، جازعى ساۋىقتىرۋ قىزمەتىن ۇيىمداستىراتىن ءاربىر زاڭدى جانە جەكە تۇلعالاردا نىساننىڭ سانيتاريالىق تالاپتارعا سايكەستىگى تۋرالى قورىتىندىسى بولۋى كەرەك. بۇل سانيتاريالىق تالاپتار ق ر دەنساۋلىق ساقتاۋ ءمينيسترىنىڭ م. ا. 2022 -جىلعى 10-تامىزداعى N78 بۇيرىعىمەن بەكىتىلگەن «بالالاردىڭ ساۋىقتىرۋ جانە ساناتوريي وبەكتىلەرىنە قويىلاتىن سانيتاريالىق- ەپيدەميولوگيالىق تالاپتار» سانيتاريالىق قاعيداسىنا سايكەس بەرىلەدى. سانيتاريالىق- ەپيدەميولوگيالىق قورىتىندىنى نىساننىڭ ورنالاسۋ ايماعىنا بايلانىستى، سول ايماقتىڭ سانيتاريالىق- ەپيدەميولوگيالىق باقىلاۋ باسقارمالارى ۇسىنادى.

ەكىنشىدەن، ءاربىر اتا- انا بالاسىنىڭ دەنساۋلىعىنا ءوزى جاۋاپتى ەكەنىن ۇمىتپاۋى كەرەك. سوندىقتان بالاسىن جازعى ساۋىقتىرۋ لاگەرىنە جىبەرەر كەزدە، بالاسىنا جەكە گيگيەنانى ساقتاۋدىڭ قاراپايىم ەرەجەلەرى تۋرالى پروفيلاكتيكالىق اڭگىمە جۇرگىزۋى قاجەت، اتاپ ايتقاندا:

- تاماقتانار الدىندا جانە دارەتحاناعا بارعان سوڭ قولدى جۋۋ؛

- كوكونىستەر مەن جەمىستەردى تۇتىنار الدىندا سۋمەن جاقسىلاپ شايۋ؛

- ساۋىقتىرۋ لاگەرلەرىنىڭ اۋماعىندا وسەتىن جابايى جەمىستەردى پايدالانۋعا تىيىم سالۋ؛

- باسسەيندە شومىلعان سوڭ، دۋشتا سابىنمەن جۋىنۋ.

- باسقا ادامداردىڭ جەكە گيگيەنا زاتتارىن (تاراقتار، ءتىس شەتكالارى جانە ت. ب. ) جانە كيىمدەرىن پايدالانباۋ؛

- تۋريستىك سەرۋەنگە شىققان كەزدە دەنەنىڭ بارلىق اشىق بولىكتەرىن جابۋ؛

سونداي- اق، ەگەر ىشەك ينفەكسياسىنىڭ بەلگىلەرى پايدا بولعان كەزدە، بالا ءوزىن ءالسىز سەزىنىپ، جۇرەك اينۋ، قۇسۋ، دەنە تەمپەراتۋراسىنىڭ جوعارلاۋى جانە ت. ب. بەلگىلەرىن بايقاسا، دەرەۋ مەديتسينالىق كومەككە جۇگىنۋدى ۇيرەتۋى قاجەت.

ۇشىنشىدەن، جازعى ساۋىقتىرۋ مەكەمەسىنە باراتىن بالانىڭ دەنساۋلىق جاعدايى تۋرالى قۇجاتى (086/ۋ نىسانى) ، ينفەكسيالىق اۋرۋلارمەن بايلانىستىڭ بولماۋى تۋرالى انىقتاماسى (071/ۋ نىسانى) بولۋى ءتيىس.

«ءاربىر اتا- انانىڭ مىندەتى - بالاسى ءۇشىن جايلى دا قاۋىپسىز دەمالىستى قامتاماسىز ەتۋ بولىپ تابىلادى» ، - دەپ حابارلادى ۆەدومستۆودا.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى