زەينەتكە شىققان ادام بوس وتىرسا، اۋىرىپ قالادى - شەبەر
بۇيىمدارى ءتىپتى ا ق ش-قا سىيلىققا جىبەرىلگەن، دەپ حابارلايدى قازاقپارات ءتىلشىسى.
اقتوبەلىك توقىماشىلار قازىر ءبىر-بىرىمەن ەتەنە تانىسىپ، الەۋمەتتىك جەلىدە ورتاق توپ اشىپ العان. توقىماشىلاردىڭ كوبى زەينەتكە شىعىپ، بوس ۋاقىتىن ءتيىمدى وتكىزىپ وتىر. ءارى تابىسى تۇراقتى، تاپسىرىستى ءار ايماقتان قابىلدايدى.
«قانداي تاپسىرىس تۇسەدى، ءبارىن توقيمىن. سىممەن جانە ىلمەكپەن توقي بىلەمىن. باس كيىمنەن باستاپ، اياق كيىمگە دەيىن توقۋعا بولادى. قازىر مەندە كيمەشەك، كويلەككە ارنالعان جاعا، باس كيىمنىڭ بىرنەشە ءتۇنى، ءشالى، بالالارعا ارنالعان جەيدە بار. جاس كەلىنگە ارناپ اياق كيىم مەن ورامالدى ءساندى ەتىپ توقىپ بەرە الامىن. نەگىزى بالا كۇنىمنەن باستاپ توقۋدى ۇيرەندىم. ءبىراق ءومىر بويى اسپاز بولىپ جۇمىس ىستەپ، وسى ىسكە دەن قويۋعا مۇمكىندىك بولمادى. ال قازىر بار ىنتامدى سالامىن. توقىماي، بوس وتىرسام اۋىرىپ قالاتىن كۇيگە ءتۇستىم. ءتىپتى كوزىلدىرىك تە كيمەي كەتتىم. قازىر جاسىم 70 تە»، - دەدى شەبەر تولەبيكە قۇلتايەۆا.
كىشكەنتايىنان قوي قىرقىپ، ءجۇن جۋىپ، ونى ءتۇتىپ، يگىرگەن ۇلكەندەرگە قولقابىس ەتىپ، ءوزى دە ۇيرەنىپ العانىن ايتتى شەبەر. الايدا قازىر يىرىلگەن ءتۇرلى ءتۇستى، ءتۇرلى ساپاداعى ءجىپتى بازاردان وڭاي تاۋىپ الۋعا بولادى. سيرەك كەزدەسەتىندەرىن تاپسىرىسپەن الدىرادى.
«تاياۋدا استانادا «تاقيا fest» ۇيىمداستىرىلىپ، سوعان ون توقىماشى بارىپ كەلدىك. ءوزىم توقىماشىلاردىڭ رەسپۋبليكالىق توبىنا قوسىلىپ الدىم. بايلانىس جاقسى بولعان سوڭ ءتۇرلى شاراعا قاتىسامىز. تەك قولونەر شەبەرلەرىنىڭ كورمەسى قالادا كوپ بولمايدى. بىزگە ساتۋعا ارنالعان ءبىر بۇرىش بەرسە ەكەن دەيمىن. سوندا شەبەرلىگىمىزدى شىڭداپ، وزگەلەرگە دە ۇيرەتىپ، توبىمىزداعى ادام سانى كوبەيەر ەدى»، - دەدى تولەبيكە قۇلتايەۆا.
شەبەر ءار كۇنىن جوسپارلامايدى. ءبىراق قايدا بارسا دا، قايدا جۇرسە دە قولىنان ءجىپ پەن سىمى، ىلمەگى تۇسكەن ەمەس. ەگەر ۇيدە وتىرسا، كۇنىنە ءۇش اياق كيىم، كەيدە ەكى باس كيىم توقي الادى. ۇلكەن ءشالىنى ەكى كۇن توقۋعا بولادى.
«ىلمەكپەن توقۋدى مەن 2017 -جىلى باستادىم. ءبارىن ينتەرنەت ارقىلى ۇيرەندىم. ءبىر اۋىز ورىسشا بىلمەسەم دە كورىپ، ماشىقتانىپ الدىم. 6-7 جىل بۇرىن باستاعان ىسىمدە ولجا كوپ. العاشىندا دۇنيەلەرىم الەۋمەتتىك جەلىگە سالىنبادى. قازىر ءبارىن جۇكتەپ، كورسەتىپ وتىرامىن. سىيلىققا دا بەرەمىن، ساتۋعا دا شىعارامىن. ءجىپ قىمبات. بىزگە تۇركيادان اكەلىنەدى. ءجىپتىڭ ساپاسىنا باسىمدىق بەرىلەدى، توقۋ دا ونەر. ءار شەبەردىڭ قولى ءارتۇرلى، قولىنان شىققان دۇنيەسى وزگەشە. مەن ءوز بۇيىمىمدا بىردەن تانيمىن. قولىمنان شىققان دۇنيەنى ارزانعا ساتپايمىن. سەبەبى ەڭبەگىمدى باعالايمىن. كوز مايىمدى تاۋىسىپ، ۇزاق كۇن وتىرعاندا قايتارىمى بولۋى ءتيىس. ماسەلەن كيمەشەكتى 35 مىڭ تەڭگەگە باعالايمىن. ءجىبىنىڭ ءوزى تۇركيادان جەتكىزىلگەن. كەيدە ونى تابا الماي قالامىز. جاقىندا ا ق ش-قا ءۇش ءشالى جىبەردىم. ءجىبىن تارازدان الدىردىم. الماتى، استانادان تا ءجىپ الامىز»، - دەدى ول.
توقۋ - پسيحولوگيالىق جاتتىعۋ. ادامنىڭ ويعا شومىلۋىنا جول بەرمەيدى. ءتىپتى قاراپ وتىرىپ، تيىسەرگە قارا تاپپايتىن ادامعا دا ەم. ويتكەنى بار زەيىنىن سالىپ، توقۋدى باستاعان ادام ونى اياقتاعانشا بايىز تاپپايدى. ءسويتىپ ۋاقىتىن دا ءتيىمدى وتكىزەدى.
«مەن زەينەتكە شىققان سوڭ دا ءتورت جىل جۇمىستى جالعاستىردىم. ال جۇمىستى اياقتاعان سوڭ تاڭەرتەڭ تۇرام، كەشكە جاتامىن. وتە قيىن كەز. سودان ينتەرنەت كىرگىزدى. الەۋمەتتىك جەلىنى قارادىم. ۇيرەندىم. بالالارعا سىم مەن ءجىپ اكەلىپ بەر دەدىم. ول كەزدە كوزىلدىرىك كيدىم. جازدا توقيتىنىمدى الىپ، كوزىلدىرىكتى وتىرعان جەرىمدە ۇمىتىپ كەتىپپىن. سودان وزگەلەرگە قاراپ، مەن دە كوزىلدىرىك كيمەي كەتتىم. قازىر كيسەم اۋىرتادى. بۇل دا توقىما توقىعاننىڭ قۇدىرەتى دەپ ەسەپتەيمىن»، - دەدى شەبەر.
