قازاقستاندا ءالى دە تاربيەشى، كۇزەتشى، جۇرگىزۋشى سەكىلدى ماماندارعا سۇرانىس وتە جوعارى
ناۋرىز ايىمەن سالىستىرعاندا بوس ورىندار سانى 17 پايىزعا (12,5+ مىڭ)، ال تۇيىندەمە - 16,4 پايىز - عا (10,4+ مىڭ) ءوستى. بوس جۇمىس ورىندارىنىڭ دا، تۇيىندەمەلەردىڭ دە ءوسۋى نەگىزىنەن ەلدىڭ بارلىق دەرلىك ايماقتارىندا اۋىل شارۋاشىلىعى سالاسىنداعى بەلسەندىلىك ەسەبىنەن بولدى، دەپ حابارلايدى قازاقپارات.
بىلىكتىلىگى جوق جۇمىسكەرلەرگە سۇرانىستىڭ ايتارلىقتاي وسۋىنە قاراماستان (42+ پايىز نەمەسە 6,5+ مىڭ)، بىلىكتىلىك قۇرىلىمىندا بوس جۇمىس ورىندارىنىڭ سانى بويىنشا ەڭ ۇلكەن سۇرانىس ورتا بىلىكتى ماماندارعا (بارلىق بوس جۇمىس ورىندارىنىڭ 40 پايىز) ءالى دە ساقتالىپ وتىر.
بىلىكتىلىگى جوعارى كادرلارعا قاجەتتىلىك شامالى ءوستى - 29,1 مىڭنان 29,7 مىڭعا دەيىن، ياعني 2 پايىزعا عانا ءوستى، بۇل رەتتە ەڭبەك نارىعىندا ورتاشا بىلىكتى قىزمەتكەرلەرگە قاتىستى سۇرانىس پەن ۇسىنىس اراسىندا ۇلكەن الشاقتىق بايقالدى: قاجەتتىلىك 1,5 ەسە جوعارى بولدى - 22,5 مىڭ تۇيىندەمەگە 34,5 مىڭ بوس ورىن.
«كادرلارعا سۇرانىستىڭ ارتۋىن اتىراۋ جانە قاراعاندى وبلىستارىن قوسپاعاندا، بارلىق وڭىرلەر كورسەتىپ وتىر. سونىمەن قاتار جەتىسۋ وبلىسىندا جۇمىس بەرۋشىلەردىڭ بەلسەندىلىگى ءساۋىر ايىندا ەكى ەسەگە جۋىق، ياعني 1,8 مىڭنان 3,5 مىڭعا دەيىن ءوستى. بۇل ءوسىم نەگىزىنەن اۋىل شارۋاشىلىعى جۇمىسكەرلەرى ءۇشىن بوس جۇمىس ورىندارى ەسەبىنەن بولىپ وتىر»، - دەدى «ەڭبەك رەسۋرستارىن دامىتۋ ورتالىعى» ا ق ستراتەگيا جانە ۇلكەن دەرەكتەر دەپارتامەنتى ديرەكتورىنىڭ ورىنباسارى ۇلپان شەگەنوۆا.
ءساۋىر ايىندا بىلىكتىلىگى جوق جۇمىسكەرلەرمەن قاتار اۆتوموبيل جۇرگىزۋشىلەرى (1,9 مىڭ بوس جۇمىس ورنى)، كۇزەتشىلەر (1,6 مىڭ بوس جۇمىس ورنى) جانە تاربيەشىلەر (1,4 مىڭ بوس جۇمىس ورنى) جوعارى سۇرانىسقا يە بولدى.
سونىمەن قاتار ونلاين-ساتۋ مەنەدجەرى (457+ بوس جۇمىس ورنى) ، جول جوندەۋشىلەر (428+ بوس جۇمىس ورنى) جانە اباتتاندىرۋشى (411+ بوس جۇمىس ورنى) سياقتى جۇمىسشىلارعا سۇرانىس ارتتى.
«ەەب مالىمەتتەرى بويىنشا، ءساۋىر ايىندا ەڭبەك نارىعىندا ەڭ سۇرانىسقا يە جانە تاپشى كادرلار كۇزەتشىلەر مەن تاربيەشىلەر بولدى. ماسەلەن، قاراعاندى وبلىسىندا (23 تۇيىندەمە، 165 بوس ورىن بولعان)، استانادا (164 بوس ورىنعا 42 تۇيىندەمە) جانە الماتىدا (119 بوس ورىنعا 56 تۇيىندەمە) تاربيەشىلەر جەتىسپەدى. بۇل وڭىرلەردە ىزدەنۋشىلەردىڭ سۇراعان جالاقى دەڭگەيى جۇمىس بەرۋشىلەر ۇسىنعان ەڭبەكاقى مولشەرىنەن 1,5 ەسە اسىپ تۇسكەنىن ايتا كەتۋ كەرەك»، - دەدى ۇلپان شەگەنوۆا.
كۇزەتشىلەر پاۆلودار وبلىسىندا (223 بوس ورىنعا 38 تۇيىندەمە)، سونداي-اق استانا (177 بوس ورىنعا 39 تۇيىندەمە) جانە الماتى (161 بوس ورىنعا 49 تۇيىندەمە) قالالارىندا ەڭ كوپ سۇرانىسقا يە بولدى.
بۇل رەتتە ىزدەنۋشىلەر ەڭبەكاقىسى ايىنا 150 مىڭ تەڭگەدەن جوعارى بولعانىن قالايدى، ال جۇمىس بەرۋشىلەر 110 مىڭ تەڭگەدەن باستاپ ۇسىنۋعا دايىن بولدى.
كادرلاردىڭ كوپتىگى ءداستۇرلى تۇردە ەلدىڭ وڭتۇستىك وڭىرلەردە بايقالدى.
ماسەلەن، تۇركىستان وبلىسىندا تۇيىندەمە سانى 6,2 مىڭعا، ماڭعىستاۋدا - 2,6 مىڭعا، قىزىلوردا وبلىسىندا - 2 مىڭعا جانە شىمكەنت قالاسىندا - 1,6 مىڭعا ارتتى.
«كاسىپتەر بولىنىسىندە بىلىكتى ىزدەنۋشىلەر اراسىندا قازاندىق جابدىقتارىنىڭ وپەراتورلارى كوپ بولدى - ۇسىنىلعان بوس جۇمىس ورىندارىنىڭ سانى نەبارى 29 دى قۇراسا، ال ىزدەنۋشىلەر 596 تۇيىندەمە ورنالاستىردى، ولاردىڭ ۇشتەن ەكىسى باتىس قازاقستان وبلىسىندا بەرىلدى. سونداي-اق، تىگىنشىلەر (760 تۇيىندەمەگە 355 بوس جۇمىس ورنى) جانە زاڭگەرلەر (802 تۇيىندەمەگە 415 بوس جۇمىس ورنى) كوپ بولدى. بۇل رەتتە زاڭگەر- ىزدەنۋشىلەردىڭ 33 پايىزى مەگاپوليستەردىڭ تۇرعىندارى»، - دەدى ۇلپان شەگەنوۆا.
ىزدەنۋشىلەردىڭ جاس قۇرىلىمى وتكەن ايدا ءىس جۇزىندە وزگەرگەن جوق - ەڭ بەلسەندى كاتەگوريا - 16-35 جاس ارالىعىنداعى جاستار.
ءوز تۇيىندەمەلەرىندە سۇرالعان جالاقىنىڭ ەڭ جوعارى مولشەرىن كوبىنە كورپوراتيۆتىك سەكتوردىڭ باس ديرەكتورلارى، ينۆەستيتسيالىق جوبالار جونىندەگى ديرەكتورلار جانە تاۋار بيرجاسى بويىنشا ترەيدەرلەر اراسىندا ىزدەنۋشىلەر - ورتا ەسەپپەن 1,5 ميلليون تەڭگەدەن، ونەركاسىپتىك الپينيستەر - 1,2 ميلليون تەڭگەدەن، ونەركاسىپتەگى قىزمەت باستىقتارى - 900 مىڭ تەڭگەدەن باستاپ كورسەتتى.
ال جۇمىس بەرۋشىلەر كاپيتاننىڭ ۆاحتالىق كومەكشىلەرى ءۇشىن - ورتا ەسەپپەن 800 مىڭ تەڭگەدەن، بيزنەس- پروتسەستەردى وڭتايلاندىرۋ جونىندەگى باسشىلار ءۇشىن - 700 مىڭ تەڭگەدەن، سونداي-اق بۇرعىلاۋ قوندىرعىسىنىڭ مەحانيكتەرى مەن ونەركاسىپتىك جابدىقتاردىڭ مەحانيكتەرى ءۇشىن ورتا ەسەپپەن 664 مىڭ تەڭگەدەن استام ەڭبەكاقى تولەۋدى ۇسىندى.
وسىلايشا، ءساۋىر ايىنداعى الدىڭعى ايلارمەن سالىستىرعاندا، ەەب- دا جۇمىسشىلاردى ىزدەۋ جانە جالداۋ ءۇردىسىنىڭ وسكەنى بايقالدى.
اۋىلشارۋاشىلىق بيزنەسىن جۇرگىزۋ ءۇشىن قولايلى اۋا-رايىنىڭ باستالۋىمەن بايلانىستى ەڭبەك نارىعىنىڭ ماۋسىمدىق ەرەكشەلىكتەرى وسى سالاداعى كادرلارعا سۇرانىستىڭ ارتۋىنا ىقپال ەتتى.
