ەۋروپالىق وداق - ورتالىق ازيا ەكونوميكالىق فورۋمىندا قانداي ماسەلەلەر كوتەرىلدى
ءاليحان سمايىلوۆ فورۋمنىڭ ءوڭىرارالىق ديالوگتى نىعايتۋعا ەرەكشە ىقپال ەتەتىنىن جەتكىزدى.
«جوعارى دەڭگەيدە وتكەن وتىرىستا ءبىز ءوزارا ىسكەرلىك بايلانىستىڭ اۋقىمىن كەڭەيتۋ بويىنشا جان- جاقتى پىكىر الماستىق. بۇل رەتتە ءوڭىردىڭ ەكونوميكالىق تۇراقتىلىعى ءبىرىنشى كەزەكتە ءبىزدىڭ ورتاق كۇش- جىگەرىمىز بەن ناقتى قادامدارىمىزعا بايلانىستى ەكەنىن اتاپ وتكەن ءجون. ول ءۇشىن ەركىن باسەكەنى دامىتۋ، ينۆەستيتسيا تارتۋ، جاڭا جۇمىس ورىندارىن قۇرۋ، بيزنەستى قولداۋعا باسىمدىق بەرۋ قاجەت»، - دەدى ءاليحان سمايىلوۆ.
ونىڭ سوزىنشە، جاسىل ەكونوميكانى دامىتۋ مەن سيفرلاندىرۋ ماسەلەسىنە ەرەكشە كوڭىل ءبولىندى.
«اتاپ ايتقاندا، كليماتتىڭ وزگەرۋىنە قارسى كۇش بىرىكتىرۋ تۋرالى جالپى تۇسىنىستىككە قول جەتتى. ورتالىق ازياداعى ەكولوگيالىق قاۋىپسىزدىكتى قامتاماسىز ەتۋ جولدارى، ونىڭ ىشىندە سۋ رەسۋرستارىن تەگىن پايدالانۋ ماسەلەسى كەڭىنەن تالقىلاندى. ءوڭىر ىشىندەگى جانە ورتالىق ازيا مەن ەۋروپا اراسىنداعى ءوزارا كولىك بايلانىسىن جاقسارتۋ تاقىرىبى دا قوزعالدى. بۇل ورايدا ورتالىق ازيانىڭ كولىك ينفراقۇرىلىمىنا ينۆەستيتسيا تارتۋ جونىندەگى جول كارتاسىن ازىرلەۋ جونىندە كەلىسىم جاسالدى»، - دەدى پرەمەر- مينيستر.
ءاليحان سمايىلوۆ ق ر ۇكمىەتى ەۋروپالىق ينۆەستيتسيا بانكىنىڭ ورتا ازيادا ەكى وڭىرلىك وكىلدىگىن اشۋ تۋرالى باستاماسىن قولدايتىنىن ايتتى.
«بۇل ءوز كەزەگىندە ينۆەستيتسيا تارتۋعا تىڭ سەرپىن بەرەتىنىن اتاپ وتكىم كەلەدى. جالپى ءبىز ورتالىق ازيا مەن ەۋروپالىق وداق اراسىنداعى ءداستۇرلى قارىم- قاتىناس حالىقتارىمىزدىڭ يگىلىگى ءۇشىن دامي بەرەدى دەپ سەنەمىز»، - دەدى ق ر پرەمەر- ءمينيسترى ءاليحان سمايىلوۆ.
