م ءا م س اياسىندا ەم الماعان سالىمشىلارعا اۋدارعان اقشاسى قايتارىلا ما – د س م جاۋابى
ورتالىق كوممۋنيكاتسيالار قىزمەتىندە وتكەن بريفينگىدە دەنساۋلىق ساقتۋ مينيسترلىگى مەن الەۋمەتتىك مەديتسينالىق ساقتاندىرۋ قورىنىڭ وكىلدەرىنە وسىنداي ساۋال قويىلدى، دەپ حابارلايدى قازاقپارات ءتىلشىسى.
«جاقىندا ءبىر دەپۋتات الەۋمەتتىك مەديتسينالىق ساقتاندىرۋ قورىنا اۋدارعان اقشاسى پايدالانىلماسا، جۇيەدەگى ازاماتتارعا تىم بولماسا 50 پايىزىن قايتارىپ بەرۋ تۋرالى باستاما كوتەردى. بۇعان نە ايتار ەدىڭىز؟» دەپ سۇرادى جۋرناليست.
«الەۋمەتتىك مەديتسينالىق ساقتاندىرۋ قورى» كوممەرتسيالىق ەمەس اكسيونەرلىك قوعامىنىڭ باسقارما ءتوراعاسى ءسابيت احمەتوۆ دارىگەرلەردىڭ جۇكتەمەسىن ازايتۋ باعىتىندا قولعا الىنعان شارالاردى ءسوز ەتتى.
«ءبىزدىڭ م ءا م س جۇيەسى ورتاق ىمىرالى جاۋاپكەرشىلىككە نەگىزدەلگەن. ەگەر جۇيەگە قاتىسۋشىلارعا سالىمىنىڭ 50 پايىزىن قايتارساق، 80 پايىز ادامنىڭ م ءا م س اياسىندا تەگىن مەديتسينالىق قىزمەت الۋى قيىندايدى. ويتكەنى جۇيەدەگى ازاماتتاردىڭ 80 پايىزىنىڭ ايلىعى سونشالىق كوپ ەمەس. ارى كەتسە، 30-40 مىڭ تەڭگە قايتاراتىن شىعارمىز. ءبىراق ونىڭ ءبارىن وسىلاي قايتارساق، قاي جەردەن كومەك الادى؟ اقىلى ەمدەلۋگە جەكە قاراجاتى جەتە مە؟ وتاسى 10 ميلليون تەڭگە بولسا، ونى قايدان تولەيدى؟ بۇل جەردە «الەۋمەتتىك» دەگەن سوزگە ءمان بەرۋ كەرەك. بىزگە ايلىعىنىڭ جوعارى بولعانىنا بايلانىستى كوبىرەك اقشا اۋداراتىن ادامدار قالىپتى جاعدايدا دا دەنساۋلىعىنا جاقسى قارايدى. ولاردىڭ كوبى م ءا م س اياسىندا مەديتسينالىق ۇيىمدارعا جۇگىنبەيدى دە. نەگىزىنەن زەينەتكەرلەر، بالالار، مۇگەدەكتىگى بار ادامدار جۇگىنەدى»، - دەدى قوردىڭ باسقارما ءتوراعاسى.
دەنساۋلىق ساقتاۋ ۆيتسە-ءمينيسترى تيمۋر سۇلتانعازين بۇل ساۋالعا حالىقارالىق تاجىريبەدەن مىسال كەلتىرە وتىرىپ جاۋاپ بەردى.
«دۇنيەجۇزىندە مۇنداي ساقتاندىرۋدىڭ بىرنەشە ءتۇرى بار. ءبىراق جەكەلەنگەن شوتتار، جەكەلەگەن سالىمشىلارعا اقشانى قايتارۋ دەگەن تاجىريبە جوق. تەك سينگاپۋردە جەكەلەگەن شوتتار بار. ول وتە باي مەملەكەت ەكەنىن وزدەرىڭىز بىلەسىزدەر. جەكەلەگەن شوتتاعى اقشانى وزىنە عانا جۇمساۋ، جۇمساماسا قايتارۋ دەگەن تاجىريبە سول مەملەكەتتە عانا بار. قالعان مەملەكەتتەردىڭ بارىندە ىنتىماقتاستىقتىڭ ارقاسىندا قاراجاتى بار ادامدار كەدەيلەر ءۇشىن تولەيدى، ساۋ ادامدار اۋرۋ ادامدار ءۇشىن تولەيدى. ءبىزدىڭ دە الەۋمەتتىك ساقتاندىرۋ جۇيەمىز تۋرا دامىعان مەملەكەتتەر سياقتى وسىنداي پرينتسيپكە نەگىزدەلگەن. قايتارۋ مەحانيزمى جوق. زاڭ بويىنشا ون مينيمالدى ايلىق كورسەتكىشتەن اسىپ كەتسە، ليميت بار. ەڭ كوپ دەگەندە ءبىر ادام ايىنا 14 مىڭ تەڭگە عانا تولەيدى. ودان اسىرىلمايدى»، - دەدى تيمۋر سۇلتانعازين.
