بيىلدان باستاپ قازاقستاندىقتار ۆەتنامعا ۆيزاسىز بارا الادى
«ق ر ۇكىمەتى مەن ۆەتنام سوتسياليستىك رەسپۋبليكاسىنىڭ ۇكىمەتى اراسىنداعى ۇلتتىق، جالپىازاماتتىق پاسپورت يەلەرىن ۆيزالىق تالاپتاردان بوساتۋ تۋرالى كەلىسىمنىڭ جوباسى ماقۇلدانسىن. ق ر پرەمەر-ءمينيسترىنىڭ ورىنباسارى - سىرتقى ىستەر ءمينيسترى مۇرات ءابۋعالي ۇلى نۇرتىلەۋگە وسى كەلىسىمگە ق ر ۇكىمەتى اتىنان قول قويۋعا وكىلەتتىك بەرىلسىن»، - دەلىنگەن اشىق ن ق ا پورتالىندا جاريالانعان قۇجاتتا.
قاۋلى جوباسىندا كورسەتىلگەندەي، ەندى قازاقستاندىقتار ۆەتنامعا، تيىسىنشە ول ەل ازاماتتارى قازاقستانعا 30 كۇنگە ۆيزاسىز كەلە الادى.
«ەگەر ادامدار ەكىنشى مەملەكەت اۋماعىندا 30 كۇننەن ارتىق قالۋعا نيەت بىلدىرسە، وسى مەملەكەتتىڭ زاڭناماسى مەن نورماتيۆتىك اكتىلەرىنە سايكەس تالاپ ەتىلەتىن ءتيىستى ۆيزا الۋعا مىندەتتەلەدى»، - دەپ جازىلعان كەلىسىمدە.
قۇجات 2- ماۋسىمعا دەيىن كوپشىلىك تالقىلاۋدا بولادى.
قوسا كەتسەك، 17- مامىردا قازاقستان مەن قىتاي ءوزارا ۆيزاسىز رەجيم تۋرالى كەلىسىمگە قول قويدى.
