قانداستاردىڭ باسىم بولىگى قاي ەلدەن كوشىپ كەلەدى - كوميتەت ەسەبى

«تاۋەلسىزدىك العان ساتتەن بەرى ەلىمىزگە 1 ميلليون 113 مىڭ قانداس كەلدى. ولاردىڭ جارتىسىنان استامى، 559 مىڭى وزبەكستاننان كەلسە، قىتايدان - 358 مىڭ، تۇرىكمەنستاننان - 76 مىڭ، موڭعوليادان - 57 مىڭ، اۋعانستاننان - 13 مىڭ، رەسەيدەن - 17 مىڭ قانداس كەلگەن»، - دەدى كوميتەت باسشىسى «وتانداستار قورىنىڭ» قوعامدىق كوميسسياسىنىڭ وتىرىسىندا.

قانداستاردىڭ باسىم بولىگى الماتى وبلىسىنا قونىستانعان - 311 مىڭ، تۇركىستان وبلىسى مەن شىمكەنت قالاسىنا - 218 مىڭ، ماڭعىستاۋ وبلىسىنا - 164 مىڭ، جامبىل وبلىسىنا - 93 مىڭ، ش ق و - 54 مىڭ، اقمولا وبلىسىنا - 48 مىڭ قانداس كوشكەن. استانا مەن الماتى قالالارىنا سوڭعى ەكى جىلدا رەسەي فەدەراتسياسىنان قانداستار كوپتەپ كەلگەن.

سپيكەردىڭ ايتۋىنشا، قانداستار قاي مەملەكەتتەن كوشىپ كەلسە، سول ەلگە جاقىنداۋ وڭىرلەرگە ورنالاسادى.

«قازاقستانعا كەلىپ-كەتۋ ستاتيستيكاسىنا كەلسەك، ەلىمىزگە جىلىنا 7 ميلليون شەتەلدىك كەلەدى جانە 7 ميلليون شەتەلدىك قايتا كەتەدى. شەتەلگە شىعاتىن قازاقستاندىقتاردىڭ سانى شامالاس - 6,9 ميلليون ادام شەتەلگە شىعادى جانە قايتىپ كەلەدى. بۇل ءبىزدىڭ اينالىم»، - دەدى ءىلياس يسپانوۆ.

الەۋمەتتىك كودەكستەگى «اتا جولى» كارتاسى ەنگىزىلگەنىن اتاپ ءوتتى. وندا قانداستارعا 10 جىلدىق جەڭىلدەتىلگەن ۆيزا راسىمدەپ، قازاقستاندا ءوز كاسىبىن جۇرگىزۋگە مۇمكىندىك بەرىلەدى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى