شەتەلدەگى قازاقتارعا ارنالعان ينتەرنەت-سەرۆيس ىسكە قوسىلدى

بۇل تۋرالى «وتانداستار» قورى» ك ە ا ق پرەزيدەنتى ابزال ساپاربەك ۇلى ايتىپ بەردى، دەپ حابارلايدى قازاقپارات ءتىلشىسى.

«پرەزيدەنت قاسىم-جومارت توقايەۆتىڭ تاپسىرماسىنا سايكەس، قازاقستان رەسپۋبليكاسىنان تىس جەرلەردە تۇراتىن قازاقستاندىقتاردى شوعىرلاندىرۋ جانە ەلدىڭ قوعامدىق ومىرىنە تارتۋ ماقساتىندا سىرتقى ىستەر مينيسترلىگىمەن بىرلەسىپ، «قازالەم» اتتى ينتەرنەت-سەرۆيستى ىسكە قوستىق. جوبانىڭ ماقساتى - شەتەلدەگى ەتنيكالىق قازاقتارعا، بۇرىنعى وتانداستارىمىزعا جان-جاقتى اقپارات بەرۋ عانا ەمەس، ولارمەن ءوزارا پايدالى جوبالار توڭىرەگىندە بىرگە جۇمىس ىستەۋ. ۆەب-پلاتفورما قازىر قازاق، ورىس، اعىلشىن تىلىندە ىسكە قوسىلدى. فرانسۋز، قىتاي، تۇرىك تىلدەرىندە جاقىن ارادا ىسكە قوسىلادى. سونداي-اق توتە جانە لاتىن قارپىندە دە جۇمىس ىستەيدى. وسى اۋقىمدى جوبانىڭ باس وپەراتورى بولىپ «وتانداستار قورى» بەكىتىلگەن»، - دەدى ابزال ساپاربەك ۇلى قور جانىنداعى قوعامدىق كوميسسيانىڭ وتىرىسىندا.

قور باسشىسىنىڭ ايتۋىنشا، شەتەلدە تۇراتىن بەلگىلى، دارىندى ەتنيكالىق قازاقتار مەن وتانداستاردىڭ بازاسىن تولىقتىرۋ جالعاسۋدا.

سونىمەن بىرگە، ق ر ۇكىمەتىنىڭ «شەتەلدەگى ەتنيكالىق قازاقتاردى قولداۋ جونىندەگى 2023-2027-جىلدارعا ارنالعان ءىس-شارالار جوسپارى» قاۋلىسى ازىرلەنۋدە.

«ا ق ش- تا العاش رەت وتانداستار فورۋمىن وتكىزۋ جوسپاردا بار. گەرمانيادا كەزەكتى ەۋروپا قازاقتارىنىڭ قۇرىلتايىن، ماسكەۋ قالاسىندا رەسەي قازاق ۇيىمدارى باسشىلارىمەن باسقوسۋ جانە مونعوليادا كىشى قۇرىلتايدى وتكىزۋ جۇمىستارى ءجۇرىپ جاتىر. وسى رەتتە شەتەلدەگى باسقوسۋلاردا توي-دۋمان فورماتىنان گورى، ناقتى پىكىر، ۇسىنىس، عىلىمي-پراكتيكالىق فورماتپەن تولىقتىرۋ ءداستۇرى قالىپتاسۋدا. الداعى ەۋروپا قازاقتارى قۇرىلتايىندا تۇڭعىش رەت ەۋروپا قازاق جاستارىنىڭ باسقوسۋىن وتكىزۋ جانە ولاردىڭ كەڭەسىن قۇرۋ كوزدەلەدى»، - دەدى ا. ساپاربەك ۇلى.

سونىمەن بىرگە، «ۇلى دالا» كىتاپتار سەرياسى شەڭبەرىندە شەتەلدەگى ەتنيكالىق قازاقتاردىڭ بۇرىن-سوڭدى قازاقستاندا جاريالانباعان تىندىلارىن جيناپ، بيىل 10 كىتابىن باسىپ شىعارۋ جوباسى باستالىپ كەتتى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى