بۇكىل الەم دالدىكتە تۇر

ادامدار سەكىلدى جان جانۋارلار دا قۋات الۋ ءۇشىن وتتەگىنى قاجەت ەتەدى. تىنىستاۋ نەگىزىندە سول وزىنە كەرەكتى وتتەگىنى الىپ وتىرادى. اسا قاجەتتى بولعاندىقتان وتتەگىنىڭ اۋادا كوپ بولعانىن قالارىمىز ءسوزسىز. الايدا، اللاه تاعالا بۇل الەمدى ءبىزدىڭ سانامىزعا شاقتاپ جاراتپاعان. ولاي دەيتىن سەبەبىمىز، وتتەگىنىڭ تەز جاناتىن قاسيەتىن ۇمىتپاۋ كەرەك. 21 پايىزدان ءسال عانا ارتىپ، كوبەيگەن ءار ءبىر وتتەگى نايزاعايدان تۇتانىپ، ءبىر ورماندى ورتەپ جىبەرەتىندەي قاۋقارعا يە. 25 پايىزدان اساتىن جوعارعى وتتەگى مولشەرى بولسا، جەمىس-جيدەك، كوكونىس بىتكەننىڭ جانىپ، كۇل بولۋىنا بىلاي جەتەدى. ونداي جاعدايدا بۇكىل تروپيكالىق ورماندار مەن اركتيكالىق تۋندرالار قۇرىپ، الاپات ورتكە قارسى تۇرۋ تىپتەن مۇمكىن بولماس ەدى. دەمەك اۋاداعى قازىرگى وتتەگى مولشەرى كەرەكتى تەپە تەڭدىكتى ساقتاۋدا كەرەمەت دالدىكتى كورسەتۋدە.

وتتەگى مەن كومىرقىشقىلدىڭ ۇنەمى قولدانىستا بولاتىندىعىنا قاراماستان، اۋاداعى تەپە تەڭدىگىنىڭ ۇنەمى ساقتالۋى دا تاڭعالارلىق. جان جانۋارلار وتتەگىن پايدالانىپ، وزدەرىنە زياندى كومىرقىشقىل گازىن سىرتقا شىعارادى. وسىمدىكتەر بولسا، كومىرقىشقىل گازىن قابىلداپ، وتتەگىن وندىرەدى. كۇن سايىن وسىلايشا ميلليونداعان توننا وتتەگى ءوندىرىلىپ، اۋاعا جايىلادى.

جان-جانۋارلار سەكىلدى وسىمدىكتەر دە وتتەگىن پايدالانىپ، كومىرقىشقىل گازىن شىعارسا، وندا نە بولار ەدى؟ وندا پلانەتامىزدىڭ جۇيەسى بۇزىلار ەدى. ءسال ءبىر ۇشقىن شىقسا، دەرەۋ تۇتانىپ، وت جالىنعا ورانار ەدىك. اۋاداعى باسقا دا گازدار سياقتى وتتەگىنىڭ دە قاۋىپ توندىرمەي، قايتا پايدا تيگىزۋى وتە ءدال مولشەردە بولۋى، بۇل تۇستا دا تەپە تەڭدىكتى ساقتالۋى جاراتۋشىنىڭ كەرەمەت قۇدىرەتى. بۇنداي كەرەمەت تەپە تەڭدىكتەردى ءوز وزىنەن ياكي كەزدەيسوق پايدا بولدى دەۋ اقىماق باس بولماسا، اقىلعا سىيىمسىز.

تىنىستاۋ

اۋا تىعىزدىعىنىڭ تىنىستاۋ ءۇشىن كەرەمەت جاراتىلعانى دا ەشقانداي كەزدەيسوقتىقتىڭ بۇعان قاتىسى جوقتىعىن كورسەتەدى. قالاساق تا، قالاماساق تا ءسات سايىن تىنىستاۋمەن بولامىز. ۇنەمى وكپەمىزگە دەم تارتىپ، سالدەن كەيىن اق سول اۋانى سىرتقا شىعارامىز. دەنەمىزدە ءسات سايىن ميلياردتاعان بيوحيميالىق ۇردىستەر وتتەگىنىڭ ارقاسىندا جۇزەگە اسادى. سول سەبەپتى، ءبىز وتتەگىنە مۇقتاجبىز. ءدال قازىر وسى ماقالانى وقىپ وتىرعان كوزىمىزدىڭ كورۋىندە دە وتتەگىنىڭ رولى بار. كوز قاباتىنا ءتان ميلليونداعان كلەتكا وتتەگىمەن قورەكتەنەدى. قانىمىزداعى وتتەگى مولشەرى كەمىگەندە، كوزىمىز قاراۋىتادى. دەنەدەگى بۇلشىق ەتتەردىڭ، وسى بۇلشىق ەتتەردى قۇراپ وتىرعان كلەتكالاردىڭ بارلىعى كاربون قوسپالارىن جاعادى، ياعني وتتەگىمەن رەاكسياعا ءتۇسۋ ارقىلى قۋات وندىرەدى. بۇكىل عالام ءدال وسىنداي دالدىكتە تۇر. ءجۇز پايىز دالدىكتە!

بەردىبەك ماسەنوۆ

دەرەككوز:«نامىس» سايتى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى