مونشا، ساۋنا ەرلەرگە زيان ەكەنىن بىلەسىز بە؟ وتاندىق ۋرولوگ جاۋابى

وسى سياقتى ماڭىزدى سۇراقتارعا ۋرولوگ- اندرولوگ تۇرار قۇرمانبەكوۆ جاۋاپ بەردى.

ونىڭ ايتۋىنشا، ىستىق سۋ نەمەسە ىستىق مونشاداعى تەمپەراتۋرا ەر ۇرىعىنا زيان. بالالى بولۋدى جوسپارلاپ جۇرگەن ەرلەرگە ىستىق سۋعا تۇسۋگە كەڭەس بەرىلمەيدى.

«جىگىتتەر مونشا- ساۋناعا قۇمار كەلەدى. وتباسىن قۇرايىن دەپ جۇرگەن نەمەسە ۇيلەنىپ بالالى بولۋدى جوسپارلاپ جۇرگەن ەرلەرگە مونشاعا ءجيى بارۋعا كەڭەس بەرىلمەيدى. سەبەبى ۇرىق ەر جۇمىرتقاسىندا وندىرىلەدى. ونىڭ تەمپەراتۋراسى دەنە تەمپەراتۋراسىنان 1-1,5 گرادۋس تومەن بولادى. ال ءسىز مونشاعا بارعان كەزدە 50-60 گرادۋس ىستىقتىڭ ۇستىندە وتىراسىز. ونداي جوعارى تەمپەراتۋرانى ەر جۇمىرتقاسى سۇيمەيدى، سەبەبى ىستىقتان سپەرماتوزويدتار ءولىپ قالادى نەمەسە ساپاسى تومەندەيدى»، - دەيدى ۋرولوگ.

بۇعان دەيىن ەر ادامدارعا اۆتوكولىكتەردەگى جىلىتىلاتىن ورىندىقتاردىڭ زيان ەكەنىن جازعان بولاتىنبىز. قازاقستاندىق ۋرولوگ تا كولىكتەگى ىستىق ورىندىقتىڭ ەر ۇرىعىنا كەرى اسەر ەتەتىنىن ايتادى.

«تەك مونشا-ساۋنا ەمەس جىگىتتەر كولىكتەگى ىستىق ورىندىقتاردان دا اباي بولعانى دۇرىس. ارينە، ءبارىمىز ىستىق جەردە وتىرعاندى قالايمىز، ءبىراق ونىڭ دا ءوز مولشەرى بار. ورىندىقتى تىم ىسىتىپ وتىرا بەرۋگە بولمايدى»، - دەيدى ول.

سوندىقتان ۇزاق ساپارلاردا بۇل فۋنكسيانى ءوشىرۋ كەرەك - ساپاردى باستاماس بۇرىن كولىكتەگى ورىندىقتى جىلىتقان دۇرىس.

ايتا كەتەيىك، قازاقستاندىق ۋرولوگ تۇرار قۇرمانبەكوۆ ەرلەردە ينفەكتسيا بار ەكەنىن قالاي بىلۋگە بولاتىنىن ايتقان بولاتىن.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى