قازاقستان ازاماتتىعىن العىم كەلەدى - رەسەيلىك بلوگەر پرەزيدەنت ماراپاتىنا يە بولدى
پرەزيدەنتپەن كەزدەسۋى جايىندا بلوگەر Jibek Joly تەلەارناسىنا بەرگەن سۇحباتىندا ايتىپ بەردى، دەپ حابارلايدى قازاقپارات.
يۆان چەرۆينسكي العاش رەت 2017 -جىلى ديماش قۇدايبەرگەننىڭ شىعارماشىلىعى جونىندە بەينەماتەريالدار جاريالاي باستاعان جانە وسىلايشا تۇتاس قازاقستان مادەنيەتىمەن تانىسقان.
ءانشىنىڭ قازاقستانداعى كونسەرتتەرىنە كەلىپ، ءتۇرلى شەتەلدىك فاناتتارمەن ونلاين كونسەرتتەر وتكىزگەن.
ءتىپتى 2021 -جىلى ەكى اي بويى دوستارىنىڭ شاقىرۋىمەن قازاقستاندا بولعان.
قازىر يۆان قازاقستاندىق مادەنيەت جانە سپورت قايراتكەرلەرىنىڭ جەتىستىكتەرى تۋرالى كوپ ايتادى. قازاق ءتىلىن ۇيرەنىپ، قازاقتىڭ ۇلتتىق كيىمىن كيەدى. شاپان-سۋىق جانە جەلدى اۋا رايىندا تاپتىرماس كيىم دەپ ەسەپتەيدى.
«استاناعا كەلگەنىمە ءتورت كۇن بولدى، ال جالپى 6 جىل بويى قازاقستان تۋرالى بلوگ جۇرگىزىپ كەلەمىن. بۇل ەلدى جاقسى كورەمىن، ومىرلىك جوسپارلارىمدى قازاقستانمەن بايلانىستىرامىن جانە ءوز تاراپىمنان رەسپۋبليكانى بارىنشا كەڭىنەن تاراتۋعا كۇش سالامىن. 2017 -جىلى قازاقستان جونىندە بىلەتىنىم از ەدى، ال قازىر مادەنيەتى مەن سپورتىن جاقسى بىلەمىن. التى جىل بۇرىنعى ءوزىم سياقتى باسقالارعا دا قازاقستاندى تانۋعا كومەكتەسكىم كەلەدى»، - دەدى بلوگەر Jibek Joly تەلەارناسىندا.
قازىرگى ۋاقىتتا يۆان تۇركيادا تۇرادى، وندا دا قازاق دوستارى شاقىرعان. بلوگەر ولارمەن قازاقشا سويلەسۋگە تىرىسادى جانە ازىرگە تۇرمىستىق دەڭگەيدە قازاق ءتىلىن تۇسىنەدى.
سونداي- اق، بلوگەر قازاقستان ازاماتتىعىن الۋدى كوپتەن بەرى ارماندايتىنىن ايتتى.
«مەن كوپتەن بەرى قازاقستان ازاماتى بولۋدى ارمانداپ كەلەمىن. وسىمەن التىنشى جىل جوسپارلارىمدى قازاقستانمەن بايلانىستىرىپ كەلەمىن. مەنىڭ بارلىق دوستارىم - قازاقتار. قازاقستان پرەزيدەنتىنىڭ العىس حاتى مەن توسبەلگىسى - كەرەمەت توسىنسىي بولدى. Youtube ارنامىزدىڭ ستاتيستيكاسى جاقسى، تاماشا ۆيدەولارىمىز بار، ءبىراق وسىنداي جوعارى دەڭگەيدە ءبىزدىڭ جۇمىسىمىزعا كوڭىل بولەدى دەپ ويلامادىم. ماعان پرەزيدەنت اكىمشىلىگىنەن حابارلاسقاندا قاتتى قوبالجىدىم. قاسىم- جومارت كەمەل ۇلىن كورگەندە ونىڭ بولاشاققا باعدار العان، قازاقستاننىڭ قامىن جەيتىن، وتە زاماناۋي ادام ەكەنىن ءتۇسىندىم. مۇنداي ماراپاتتار الۋدىڭ ءوزى ۇلكەن مارتەبە»، - دەيدى يۆان چەرۆينسكي.
ايتا كەتەيىك، كەشە پرەزيدەنت قاسىم- جومارت توقايەۆتىڭ توراعالىعىمەن قازاقستان حالقى اسسامبلەياسىنىڭ سەسسياسى ءوتتى.
وندا مەملەكەت باسشىسىنىڭ جارلىعىمەن حالىقتار اراسىندا بەيبىتشىلىكتى، دوستىق پەن ىنتىماقتاستىقتى نىعايتۋعا سىڭىرگەن ەڭبەگى ءۇشىن ءبىرقاتار ازامات ماراپاتتالدى.
