ەلىمىزدە شومىلۋ ماۋسىمى رەسمي تۇردە قاشان باستالاتىنى بەلگىلى بولدى
ەلىمىزدە 50 مىڭنان استام سۋ ايدىنى بار، ولاردىڭ نەگىزگى بولىگى قورعالماعان، ياعني شومىلۋ ءۇشىن قاۋىپسىز ەمەس. وسى ورايدا، توتەنشە جاعدايلار ءمينيسترى يۋري يلين ادامداردىڭ قازا بولۋىنا جول بەرمەۋ ءۇشىن كەشەندى الدىن الۋ شارالارىن قولدانۋدىڭ ماڭىزدىلىعىن اتاپ ءوتتى. بۇل رەتتە ءداستۇرلى ادىستەرگە توقتالىپ قانا قويماي، كوپشىلىكتىڭ نازارىن اۋدارۋدىڭ جانە سۋ ايدىندارىنداعى قاۋىپسىزدىك ەرەجەلەرىن ءتۇسىندىرۋدىڭ جاڭا جولدارىن تابۋ قاجەت.
وتكەن جىلى سۋ نىساندارىندا ادامدار جاپپاي دەمالاتىن، تۋريزمگە جانە سپورتقا رۇقسات ەتىلگەن 533 ورىن انىقتالدى، ونىڭ 145 ى - كوممۋنالدىق جانە 316 سى - جەكە جاعاجاي. شومىلۋ ماۋسىمى باستالعانعا دەيىن (1-ماۋسىم) قوسىمشا شومىلۋعا رۇقسات ەتىلگەن تاعى 133 ورىن ۇيىمداستىرۋ جوسپارلانىپ وتىر، ونىڭ ىشىندە 30 كوممۋنالدىق جانە 103 جەكە جاعاجاي. سونىمەن، جۇزۋگە ارنالعان رەسمي ورىنداردىڭ سانى 666 بولماق، بۇل - وتكەن جىلعى كورسەتكىشتەردەن %25 عا ارتىق.
ءمينيستردىڭ تاپسىرماسىنا سايكەس رەسمي جاعاجايلاردا شومىلۋ ماۋسىمى كەزىندە بالالاردىڭ قاۋىپسىزدىگىنە جانە ولاردى وقىتۋعا ەرەكشە نازار اۋدارىلادى. بۇل ءۇشىن بالالاردى جۇزۋگە ۇيرەتۋ بويىنشا جۇمىس جۇرگىزەتىن قاۋىپسىز جاعاجايلار جابدىقتاۋ جوسپارلانىپ وتىر.
وتكەن جىلعى ستاتيستيكا كورسەتكەندەي، 184 سۋعا باتۋ وقيعاسىنىڭ 116 سى (%63) اۋىلدىق جەرلەردە تىركەلگەن. اسىرەسە، بۇل ماسەلە وڭتۇستىك وڭىرلەردىڭ اۋىلدىق جەرلەرىندە وزەكتى. ونداعى جاساندى كانالدار مەن ارىق جۇيەلەرىنە بالالار ءجيى باتىپ كەتەدى. ماسەلەن، تۇركىستان وبلىسىنىڭ اۋماعىندا جالپى ۇزىندىعى 15 مىڭ ك م استام 3 مىڭ سۋارۋ كانالى مەن ارىقتار بار، ولاردىڭ 800 دەن استامى نەمەسە 5400 ك م ەلدى مەكەندەرگە جاقىن نەمەسە اۋىل ارقىلى وتەدى.
شومىلۋعا ارنالعان رەسمي (رۇقسات ەتىلگەن) ورىنداردىڭ بولماۋىنا جانە قولدانىستاعى جاعاجايلارعا قولجەتىمدىلىكتىڭ بولماۋىنا بايلانىستى، بەلگىلەنبەگەن جەرلەردە شومىلۋعا جول بەرمەۋ تۋرالى جۇرگىزىلىپ جاتقان ءتۇسىندىرۋ جۇمىستارىنا قاراماستان، جەرگىلىكتى تۇرعىندار، ونىڭ ىشىندە بالالار سۋارۋ كانالدارى مەن ارىقتاردا شومىلۋعا ءماجبۇر. جىل باسىنان بەرى عانا تۇركىستان وبلىسىندا اتا- اناسىنىڭ قاراۋىنسىز قالعان سۋارۋ كانالدارى مەن ارىقتارعا باتىپ كەتكەن بەس بالانىڭ قازاسى تىركەلدى.
سونىمەن قاتار، بالالارمەن بولعان جازاتايىم وقيعالارعا جىل سايىنعى تالداۋ كورسەتكەندەي، ولاردىڭ قايتىس بولۋ فاكتىلەرىنىڭ كوپشىلىگى بالالاردىڭ جازعى كەزەڭدە جۇمىسپەن قامتىلماۋى، بالالار ۇيىرمەلەرىنىڭ، سەكتسيالارىنىڭ، لاگەرلەرىنىڭ جانە ت. ب. بولماۋى نەمەسە از بولۋى سالدارىنان بولعان.
وسىعان بايلانىستى جاۋاپتى ورىنداۋشىلاردىڭ 2020-2023 -جىلدارعا ارنالعان ساناتورييلەر، تۋربازالار، ۇلتتىق ساياباقتار، وقۋ ورىندارى جانىنان اشۋ ارقىلى بالالار لاگەرلەرى جەلىسىن كەڭەيتۋدىڭ جول كارتاسى پۋنكتەرىن ىسكە اسىرۋعا نەعۇرلىم مۇقيات بولۋى قاجەت.
وسى ورايدا، وتىرىس بارىسىندا جەرگىلىكتى اتقارۋشى ورگاندارعا بالالاردى ستاتسيونارلىق باسسەيندەردە جۇزۋگە تەگىن ۇيرەتۋدى ۇيىمداستىرۋ، الەۋمەتتىك وسال وتباسىلاردان شىققان بالالارعا جەڭىلدىكتەر بەرۋ مۇمكىندىگىنە قوسىمشا نازار اۋدارۋ ۇسىنىلدى.
يۋري يلين قاۋىپسىزدىك ەرەجەلەرىن ساقتاۋ تۇرعىسىنان تابيعي جانە جاساندى سۋ ايدىندارىندا بەكىتىلگەن جاپپاي دەمالىس ورىندارىن تەكسەرۋدى قىسقا مەرزىمدە ۇيىمداستىرۋ قاجەتتىلىگىنە ەرەكشە نازار اۋداردى. سونىمەن قاتار، مينيستر دەمالۋشىلاردىڭ قاۋىپسىزدىك ەرەجەلەرىن بۇزۋىنا جول بەرمەۋ، تەك قورعالاتىن سۋ ايدىندارىندا دەمالۋ قاجەتتىلىگى تۋرالى اقپاراتتى جان-جاقتى جەتكىزۋ ءۇشىن شومىلۋ ماۋسىمى كەزىندە سۋ ايدىندارى مەن ستيحيالىق جاعاجايلارداعى جاپپاي دەمالىس ورىندارىندا رەيدتەر مەن پاترۋلدەۋ ۇيىمداستىرۋدى جانە وتكىزۋدى تاپسىردى.
