قازاقستان رەسەيگە قاتىستى سانكسيالارعا تۇسپەۋى ءۇشىن ءتيىستى شەشىم قابىلدادى
بۇل تۋرالى ق ر قارجى نارىعىن رەتتەۋ جانە دامىتۋ اگەنتتىگىنىڭ ءتوراعاسى ءمادينا ءابىلقاسىموۆا ايتتى، دەپ حابارلايدى قازاقپارات ءتىلشىسى.
«سانكسيالار مەن ولاردىڭ قارجى سەكتورىندا قولدانىلۋى ماسەلەسىنە توقتالساق، قازاقستانداعى بانكتەر، قارجى ۇيىمدارى ا ق ش- تىڭ، ۇلى بريتانيانىڭ جانە ەۋروپانىڭ قارجى سالاسىنداعى رەتتەۋشىلەرى ەنگىزگەن سانكسيا تالاپتارىن (رەسەيگە قاتىستى) ساقتاۋ ءۇشىن ءتيىستى راسىمدەرىن ايتارلىقتاي كۇشەيتىپ جاتىر»، - دەدى دەدى ءمادينا ءابىلقاسىموۆا ماجىلىستە تىلشىلەر سۇراعىنا جاۋاپ بەرە وتىرىپ.
اگەنتتىك باسشىسى قازىر بانك جۇيەسىن سانكسيالاردى اينالىپ وتۋگە پايدالانباۋ ماسەلەسىنە ەرەكشە نازار اۋدارىلىپ وتىرعانىن ايتتى.
«بۇل وتە ماڭىزدى، ءتيىستى سايكەستىك پروتسەدۋرالارىن ەكىنشى دەڭگەيلى بانكتەر دە قامتاماسىز ەتەدى. بۇل ماسەلەنى رەتتەۋ ءۇشىن ءبىز FATF تالاپتارىنا سايكەس قارجى نارىعىنىڭ ءاربىر سەكتورى ءۇشىن ەگجەي- تەگجەيلى تالاپتار مەن رەتتەۋ قادامدارىن بەكىتتىك. ياعني، بانك سەكتورى، ساقتاندىرۋ نارىعى، باعالى قاعازدار نارىعى جانە ميكروقارجى سەكتورى ءۇشىن جەكە قاۋلى مەن رەتتەۋ قادامدارى بار»، - دەدى ول.
سونىمەن قاتار ول ەلىمىزگە سانكسيالار تۋرالى ەشقانداي ەسكەرتۋ كەلمەگەنىن ايتتى.
«قازاقستاننىڭ قارجى سەكتورىنا قايتالاما سانكسيالار سالۋ قاۋپىن بولدىرماۋ ءۇشىن بارلىق قاجەت قادامداردى قولدانىپ جاتىرمىز. بۇل وتە ماڭىزدى جانە ءبىز رەتتەۋشى قۇرىلىمداردىڭ دا، سىرتقى كوررەسپوندەنت- بانكتەردىڭ دە وتاندىق بانكتەرىمىزگە قويعان تالاپتارىن تولىعىمەن ورىندايمىز»، - دەدى ءمادينا ءابىلقاسىموۆا.
