ەۋرووداق جەل ەنەرگياسى اككۋمۋلياتورىن قىتايدان الماي ءوزى شىعارادى
ەۋروپاداعى سولتۇستىك تەڭىز سامميتى وسىمەن ەكىنشى رەت ءوتىپ وتىر. العاشقى شارا دانيانىڭ ەسبەرگ قالاسىندا ۇيىمداستىرىلعان ەدى. وعان بەلگيا، دانيا، گەرمانيا جانە نيدەرلاند قاتىستى. بۇل جولى 4 ەل ولار: فرانسيا، ۇلى بريتانيا، نورۆەگيا، يرلانديا جانە ليۋكسەمبۋرگ قوسىلدى. قازىر جەل ەنەرگياسىن وندىرۋگە قاجەتتى اككۋمۋلياتوردى قىتاي شىعارادى. ەندى ەۋرووداق وسى سالانى دامىتۋعا دەن قويماق. بۇل ءۇشىن قوماقتى قارجى ءبولۋ كوزدەلگەن.
الەكساندر دە كرو، بەلگيا پرەمەر- ءمينيسترى:
- ءبىز 2030 -جىلعا تاياۋ 130 گيگاۆاتت، ال 2050 -جىلى 300 گيگاۆاتت ەنەرگيا وندىرۋگە كۇش سالماقپىز. وسى ۋاقىتقا قاراي جەلدىڭ كومەگىمەن ەۋروپادا 300 ميلليون تۇرعىندى ەلەكتر قۋاتىمەن قامتاماسىز ەتپەكپىز. جوباعا جەكەمەنشىك سەكتور دا تارتىلىپ جاتىر. وعان 120-دان اسا ەڭ ۇزدىك بىرلەستىك قاتىسادى.
ساراپشىلار دا سولتۇستىك تەڭىزدەگى جەل ەنەرگەتيكاسىنىڭ الەۋەتى جوعارى دەپ وتىر. كەزدەسۋگە قاتىسۋشىلار سالاعا ينۆەستيتسيا قۇيۋ كۇردەلى ەكەنىن ايتىپ، ونى وڭتايلاندىرۋعا كەلىستى. بۇل 2030 -جىلعا تامان ەۋرووداقتاعى جاڭعىرتىلاتىن ەنەرگيا ۇلەسىن 40 پايىزعا جەتكىزۋگە مۇمكىندىك بەرمەك.
ەممانۋەل ماكرون، فرانسيا پرەزيدەنتى:
- فرانسيا بۇل ستراتەگياعا 40 گيگاۆات تازا ەنەرگيانى وندىرۋمەن ۇلەسىن قوسۋدى كوزدەپ وتىر. بۇل ءۇشىن الداعى 15 جىلدا 40 ميلليارد ەۋرو ينۆەستيتسيا سالماقپىز. ەل اۋماعىندا 20 مىڭ جۇمىس ورىنى اشىلادى.
ەۋروكوميسسيا باسشىسى ۋرسۋلا فون دەر ليايەننىڭ ايتۋىنشا بۇل جوبادا تەڭىز استى ينفراقۇرىلىمدى قورعاۋ ماڭىزدى. وداق وسى باعىتتا ناتو- مەن بىرلەسىپ ارنايى باعدارلامانى قولعا العان.
ۋرسۋلا فون دەر ليايەن، ەۋروكوميسسيا پرەزيدەنتى:
- بۇل وندىرىستىك جوسپاردى جۇزەگە اسىرۋ بويىنشا ءبىزدىڭ بارلىق ۇسىنىستارىمىز قاراستىرىلدى. بىرىنشىدەن، بۇل زياندى قالدىقتاردى شىعارمايتىن وندىرىستەر تۋرالى زاڭ. ول تازا تەحنولوگيالار سالاسىنا وڭ ىقپال ەتىپ، يننوۆاتسياعا قولداۋ بولادى. ەكىنشىدەن، ءبىزدىڭ ەلەكتر ەنەرگياسى نارىعىنا قاتىستى رەفورمامىز جاڭعىرتىلاتىن ەنەرگيا كوزدەرىن قولدانۋدى ىنتالاندىرادى.
ەۋروپادا وففشورلى جەل ەلەكتر ستانسيالارىنا ينۆەستيتسيالار بىلتىر تومەندەپ، 10 جىل بۇرىنعى دەڭگەيگە ءتۇستى. وعان ينفلياتسيا مەن پايىزدىق مولشەرلەمەنى كوتەرۋ جانە ەنەرگەتيكا نارىعىنداعى تۇراقسىزدىق اسەر ەتتى. ساراپشىلار سولتۇستىك تەڭىز سامميتى سالاعا كوپ وڭ وزگەرىس اكەلەدى دەپ ۇمىتتەنەدى.
www.24.kz
