استانادا تۇرعىن ءۇي قۇرىلىسىنىڭ قارقىنى ازايا ما
«قالالىق ءماسليحات حالىقتى سۋمەن قامتۋ ماسەلەسىن شەشۋ ماقساتىندا جاڭا تۇرعىن ۇيلەر قۇرىلىسىنا تىيىم سالماق. ماسەلە ءماسليحات وتىرىسىندا تالقىلاندى. وسىعان قاتىستى ءسىزدىڭ پىكىرىڭىز قانداي؟» دەگەن ساۋال قويدى تىلشىلەر.
«بۇل جەردە اڭگىمە تىيىم سالۋ ەمەس، تۇرعىن ءۇي قۇرىلىسى قارقىنىن ازايتۋ تۋرالى شىعار. ءبىراق، قارقىندى بىردەن تومەندەتىپ جىبەرۋگە بولمايدى، بۇل جاعىن ءبىز اكىمدىكپەن تالقىلاعانبىز. 2020-جىلى اكىمدىك الدىندا 3 ميلليون شارشى مەتر تۇرعىن ءۇي سالۋ مىندەتى تۇردى، ول ارتىعىمەن ورىندالدى. 2021-جىلى 3 ميلليون 200 مىڭ شارشى مەتر تۇرعىن ءۇي تۇرعىزىلدى. كورسەتكىشتى 3,5 ميلليون شارشى مەترگە ارتتىرۋ تۋرالى اڭگىمە قوزعالعاندا ءبىز قارسى بولدىق. بۇل جەردە تۇزەتۋلەر كەرەك»، - دەپ جاۋاپ بەردى پرەمەر-ءمينيستردىڭ ورىنباسارى.
ونىڭ ايتۋىنشا، تۇرعىن ۇيلەر الدىمەن قاجەتتى ينفراقۇرىلىممەن (سۋ، جىلۋ، جول جانە ت. ب.) قامتىلۋى كەرەك.
«سوندىقتان دا، جاڭا جىلۋ ورتالىقتارىنىڭ قۇرىلىسى باستالدى. سونىمەن قاتار، تابيعي گازبەن قامتۋ قاتار ءجۇرىپ جاتىر. ودان بولەك، ەلەكتر ەنەرگياسى ستانساسىن سالۋ قاجەت جانە كارىز قۇبىرلارىن تارتۋ كەرەك. وسى ماسەلەلەر شەشىلگەننەن كەيىن بارىپ، تۇرعىن ۇيلەر قۇرىلىسىنىڭ قارقىنىن ۇلعايتۋ تۋرالى ءسوز قوزعاۋعا بولادى. دەگەنمەن، باسپاناعا سۇرانىس جوعارى، اسىرەسە قولجەتىمدى جانە الەۋمەتتىك»، - دەپ تولىقتىردى التاي كولگىنوۆ.
