ءبىلىم سالاسىندا قاي وڭىرلەردە جەمقورلىق فاكتىلەرى كوپ
وسىعان بايلانىستى سىبايلاس جەمقورلىققا قارسى ءىس-قيمىل اگەنتتىگىنىڭ ءتوراعاسى اسحات جۇماعالي مەن وقۋ-اعارتۋ ءمينيسترى عاني بەيسەمبايەۆ ورتا ءبىلىم بەرۋدى قارجىلاندىرۋداعى سىبايلاس جەمقورلىق قاتەرلەرىنە بىرلەسكەن تالداۋ جۇرگىزۋگە ۋاعدالاسىپ وتىر. مۇنداي شەشىم جەمقورلىققا قارسى اگەنتتىك پەن وقۋ-اعارتۋ مينيسترلىگىنىڭ وتىرىسىندا قابىلداندى.
ءمالىم ەتىلگەندەي، سوڭعى 3 جىلدا بۇل سالادا 300 دەن استام سىبايلاس جەمقورلىق قۇقىقبۇزۋشىلىعى تىركەلدى جانە 200 گە جۋىق ادام اشكەرەلەندى.
«مۇنداي قىلمىستار رەسپۋبليكانىڭ بارلىق وڭىرلەرىنە ءتان، اسىرەسە ەڭ كوپ كورسەتكىش شىمكەنت قالاسىنا، شىعىس قازاقستان، تۇركىستان جانە قىزىلوردا وبلىستارىنا تيەسىلى. قىزىلوردا، اقتوبە وبلىستارى مەن تالدىقورعان قالاسىنىڭ ءبىلىم بەرۋ قىزمەتكەرلەرىنە قاتىستى سوڭعى اتىشۋلى ىستەر ەلەۋلى سىبايلاس جەمقورلىق سحەمالارىنىڭ بار ەكەندىگىن راستايدى»، - دەدى اسحات جۇماعالي بىرلەسكەن وتىرىستا.
الدىن الا زەرتتەۋ بارىسىندا قاراجاتتى ۇرلاۋعا دايىندىق بيۋجەتتىك وتىنىمدەردى قالىپتاستىرۋ ساتىسىندا جۇرەتىنى انىقتالدى. بۇل رەتتە مەكتەپتەردىڭ، ءبىلىم بولىمدەرىنىڭ جاۋاپتى قىزمەتكەرلەرى جانە باسقا دا ادامدار ءسوز بايلاسادى. قارجىلاندىرۋدان كەيىن قاراجات قالالىق، اۋداندىق ءبىلىم بولىمدەرىنە بولىنەدى، ال ۇنەمدەلگەن سوما ەڭبەكاقى تولەۋ قورىنا اۋدارىلادى.
تەرگەۋ نۇسقاسى بويىنشا، مۇنداي تاجىريبە تالدىقورعان قالاسىنىڭ ءبىلىم ءبولىمىنىڭ باس بۋحگالتەرىنە ەسەپتە جوق ادامدارعا جانە ۇلەستەس تۇلعالارعا قارجى اۋدارۋ ارقىلى شامامەن 2 ميلليارد تەڭگە ۇرلاۋعا مۇمكىندىك بەردى.
«ءالى اۋديتورلىق تەكسەرۋ جۇرگىزىلۋدە، سوما ناقتىلانادى. الايدا ءتىنتۋ بارىسىندا كۇدىكتىدەن 1 ميلليارد تەڭگە اقشالاي قاراجات تابىلدى جانە تاركىلەندى، ونىڭ ەداۋىر بولىگى شەتەل ۆاليۋتاسىندا بولدى. مۇنداي قۇقىقبۇزۋشىلىقتار بيۋدجەتتىك وتىنىمدەردى قالىپتاستىرۋ تەتىكتەرىنىڭ جەتىلمەگەنى، ءبىلىم بەرۋ قىزمەتكەرلەرىن ورتالىقتاندىرىلعان ەسەپكە الۋدىڭ بولماۋى جانە وسى پروتسەستەردى سيفرلاندىرۋدىڭ جەتكىلىكسىزدىگى سالدارىنان بولدى»، - دەپ اتاپ ءوتتى اسحات جۇماعالي.
كەڭەس قورىتىندىسى بويىنشا تاراپتار ءبىلىم بەرۋ سالاسىنداعى جاعدايدى وزگەرتۋ بويىنشا كەشەندى شارالاردى بەلگىلەدى.
ەسكە سالايىق، ۇستىمىزدەگى ءساۋىر ايىندا انتيكور تالدىقورعاننىڭ ءبىلىم ءبولىمى قىزمەتكەرلەرىنىڭ سومكە-سومكە اقشامەن ۇستالعان ۆيدەونى جاريالاعان بولاتىن.
