بەتپەردە كيگەن جىگىت ەرەكشە بالالارى بار اناعا پاتەر سىيلادى
Massaget.kz سايتىنىڭ مالىمەتىنشە، بۇل تۋرالى قايىرىمدى جىگىت الەۋمەتتىك جەلىدەگى پاراقشاسىنا جاريالاپ، ۆيدەوسىن كورسەتتى.
ونىڭ ايتۋىنشا، اتىراۋدا تۇراتىن ەلميرانىڭ ءۇش بالاسى بار. ونىڭ ەكەۋى مەديتسينالىق ەسەپتە تۇر. 18 جاستاعى ۇلى تۋا ءبىتتى مۇگەدەك بولسا، 14 جاستاعى قىزى اۋىر ناۋقاسقا شالدىققان. وكپەسى مەن جۇرەگىن اۋىستىرۋ قاجەت. ونىڭ قىزى كەيىنگى بەس جىلدا تىنىس الۋ اپپاراتى اقىلى عانا ءومىر ءسۇرىپ جاتىر. مۇنداي كۇردەلى اعزا اۋىستىرۋ وتاسىن تەك شەتەلدىك اۋرۋحانالاردا جاسايدى. تاعدىردىڭ تاۋقىمەتىنە مويىماعان انا ەكى- ءۇش اي سايىن ەكى بالاسىن ەمگە استاناعا الىپ كەلەدى. وزدەرى اتىراۋدا جەر ۇيدە تۇرادى. بالالارىنىڭ دەنساۋلىعىنا الاڭداعان انا قايىرىمدى جىگىتكە جاعدايىن ايتىپ، حات جازعان.
قارا بەتپەردە كيگەن جىگىت بۇل جاعدايعا بەي-جاي قاراي الماپتى. العاش بارعان كەزدە تىنىس الۋ اپپاراتى مەن مەككەگە قاجىلىققا سەرتيفيكات سىيلاعان. سول كەزدە جاس ءوسپىرىم «ءوز ءۇيىمىز بولسا» دەگەن ارمانىن ايتىپتى.
«ءوزىمنىڭ ءۇيىم بولعانىن، اس بولمەسى، جۋىناتىن بولمە بولعانىن قالايمىن. جۋىناتىن بولمەمىز بولسا، اعامدى قينالماي جۋىندىرار ەدىك»، - دەدى ول.
قايىرىمدى جىگىت بالانىڭ ارمانىن ورىنداپ، توسىن سىي جاسادى. ياعني پاتەر كىلتىن تاپسىردى. كىلتتى كورگەن بالالار مەن اناسى قۋانىشتان كوز جاسىنا ەرىك بەردى.
«استانا قالاسىنان ىشىندەگى جيھازىمەن ەكى بولمەلى پاتەر سىيلادىق. قازىر ولار اتىراۋدان كوشىپ جاتىر. بالالاردىڭ مەكتەپ ماسەلەسىن شەشىپ جاتىر»، - دەيدى قارا بەتپەردە كيگەن جىگىت.
جۇمباق جىگىت وسى قۋانىشتى ءساتتىڭ ۆيدەوسىن الەۋمەتتىك جەلىگە جاريالادى. بۇل كورىنىس كوپشىلىكتىڭ جۇرەگىن ەلجىرەتتى. ءبىرى وسى كورىنىسكە ەرىكسىز جىلاعانىن ايتسا، ەندى ءبىرى بەتپەردە تاققان جىگىتكە العىسىن جاۋدىرعان. پىكىر جازعانداردىڭ بارلىعى قايىرىمدى جىگىتكە شەكسىز ريزاشىلىعىن بىلدىرگەن.
قۇپيا جىگىت بۇل جولى دا ءوزىنىڭ كىم ەكەنىن ايتۋدان باس تارتتى. ءوزى تۋرالى كوپشىلىكتىڭ بىلمەگەنىن قالايدى.
ايتا كەتەيىك، قارا بەتپەردە تاققان جىگىت بۇعان دەيىن قاتەرلى ىسىككە شالدىققان بالانىڭ ارمانىن ورىنداپ، ءتىپتى افريكاداعى بالاقايلاردى دا قۋانتقان بولاتىن.
