قۇتقارۋشىلار كوپقاباتتى ۇيلەردە بالا تەرەزەدەن قۇلاماس ءۇشىن نە ىستەۋ كەرەكتىگىن ءتۇسىندىردى

جىل سايىن كوكتەم-جاز ايلارىندا بالالار تەرەزەدەن قۇلاپ كەتەتىن وقىس وقيعالار بولىپ جاتادى. 2021-2023 -جىلدار ارالىعىندا شىعىس قازاقستان اۋماعىندا 5 بالا وسىلاي كوز جۇمعان. وسى رەتتە، ءوڭىر قۇتقارۋشىلارى قايعىلى جاعدايدىڭ الدىن الۋ ءۇشىن نە ىستەۋ كەرەكتىگىن ءتۇسىندىردى.

جۇرگىزىلگەن تالداۋ ناتيجەسىندە، تەرەزەدەن قۇلاعان بالالار نەگىزىنەن 1-3 جاستا بولاتىنى انىقتالدى. نەگىزگى سەبەپتەر - بالانى قاراۋسىز قالدىرۋ جانە تەرەزەنى اشۋعا جول بەرمەيتىن قورعانىس قۇرالدارىنىڭ بولماۋى.

«وقىس وقيعا اتا-انالار ۇلكەن بالالارىنا كىشىلەرىن قاراۋدى تاپسىرعان كەزدە دە بولادى. كەيبىرەۋلەر ءتىپتى بەس جاسار بالاسىن «ۇلكەن» دەپ ساناپ، وعان ءبىر جاسار بۇلدىرشىنگە باس-كوز بولۋدى تاپسىرىپ جاتادى. بۇل مۇلدە دۇرىس ەمەس. بالا ەرەسەكتەر سياقتى جاۋاپكەرشىلىكتى سەزىنە المايدى. كەيبىر اتا-انالار كىشكەنتاي بالالارىن كوشەگە، قۇستارعا، كولىكتەرگە قاراتۋ، اكەسىنە نەمەسە شەشەسىنە قول بۇلعاۋ ءۇشىن تەرەزە الدىنا وزدەرى شىعارادى. سونىڭ سالدارىنان بالا بيىكتىكتىڭ قانشالىقتى ءقاۋىپتى ەكەنىن تۇسىنبەيدى»، - دەيدى ش ق و ت ج د پسيحولوگى سۆەتلانا اندرۋسەنكو.

بالالار موسكيت تورىنا سۇيەنىپ، تەرەزەدەن قۇلاپ كەتۋى مۇمكىن. شىبىن-شىركەيدى ۇيگە كىرگىزبەيتىن موسكيت تور ەشقاشان بالالارعا قورعان بولا المايدى. كەرىسىنشە ونداي تور قايعىلى جاعدايعا سەبەپكەر بولادى. ويتكەنى بالا ءوزىن قاۋىپسىز سەزىنەدى دە وعان سۇيەنەدى.

وقىس وقيعانىڭ الدىن العىڭىز كەلسە:

- بالالاردى قاراۋسىز قالدىرماڭىز.

- پاتەر تەرەزەلەرىنە ارنايى قورعانىس قۇرالدارى قويىلۋى ءتيىس.

- بالا وزدىگىنەن اشا المايتىنداي ەتىپ تەرەزە تۇتقاسىن قۇلىپتاڭىز.

- بالانىڭ تەرەزە الدىنا شىعۋىنا جول بەرمەس ءۇشىن جيھازدىڭ بارلىق ءتۇرىن تەرەزەلەردەن الىسقا قويىڭىز.

- بالانى تەرەزە الدىنا شىعارىپ، كوشەدە نە بولىپ جاتقانىن كورسەتۋگە ۇيرەتپەڭىز. ول ءسىز جوقتا سونى قايتالاۋى مۇمكىن.

- بالالارعا ەرەسەكتەردىڭ قاراۋىنسىز بالكونعا شىعۋعا رۇقسات بەرمەڭىز.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى