قىزىلوردادا ەكى مەكتەپ وقۋشىلارى فۋتبول ويىنى كەزىندە توبەلەسىپ قالدى

الەۋمەتتىك جەلىدە قالاداعى مەكتەپتەردىڭ بىرىندە فۋتبول ويىنى كەزىندە وقۋشىلار توبەلەسىپ قالعانى جونىندە بەينەجازبا جاريالاندى. وندا №176 جانە №271-مەكتەپ وقۋشىلارى اراسىندا جانجال تۋىنداعانى ايتىلعان.

بۇل جونىندە قالالىق ءبىلىم ءبولىمى تومەندەگىشە جاۋاپ بەردى.

«13-ءساۋىر كۇنى №271-ورتا مەكتەپتە 9-11-سىنىپ وقۋشىلارى اراسىندا ۇلتتىق مەكتەپ ليگاسى جارىسى وتكەن ەدى. ويىن بارىسىندا جەڭىلىپ قالعان كوماندادان ەكى-ءۇش وقۋشى اراسىندا جانجال شىققان. مۇعالىمدەردىڭ ارالاسۋىمەن جانجال دەر كەزىندە توقتاتىلدى. بالالار زارداپ شەككەن جوق. ولار اتا-انالارىنىڭ قاراۋىندا. وقيعا ورنىندا مەديتسينا قىزمەتكەرلەرى بولعان. الايدا، ولاردىڭ قاجەتتىلىگى تۋىنداعان جوق»، - دەپ جازىلعان حابارلامادا.

وقيعاعا بايلانىستى قىزىلوردا وبلىستىق پوليتسيا دەپارتامەنتى تۇسىنىكتەمە بەردى.

«اتالعان دەرەك قىزىلوردا قالالىق پوليتسيا باسقارماسىنىڭ سوتقا دەيىنگى تەرگەپ-تەكسەرۋدىڭ ءبىرىڭعاي تىزىلىمىنە ق ر قىلمىستىق كودەكسىنىڭ 293-بابى بويىنشا تىركەلدى. تەرگەۋ جۇرگىزىلۋدە. ءمان-جايدى انىقتاۋ ماقساتىندا توبەلەسكە قاتىسۋشىلار پوليتسياعا جەتكىزىلدى.

ولاردىڭ ءىس-ارەكەتتەرىنە قۇقىقتىق باعا بەرىلەدى. سونداي-اق، قاتىسۋشىلار اراسىندا جانجال تۋىنداعان سپورتتىق تۋرنيردىڭ ۇيىمداستىرۋشىلارى دا پوليتسياعا جەتكىزىلدى»، - دەپ ءمالىم ەتتى دەپارتامەنتتەن.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى