باۋىرساق-فەست: پەتروپاۆلدىقتار ناۋرىز مەيرامىندا باۋىرساق جەۋدەن جارىسادى

مەرەكە كوپقاباتتى ۇيلەردىڭ اۋلالارىندا دا ۇيىمداستىرىلماق، دەپ حابارلايدى قازاقپارات ءتىلشىسى.

پەتروپاۆل قالالىق اكىمدىگى باسپا ءسوز قىزمەتىنىڭ مالىمەتىنشە، ناۋرىز مەيرامىن اتاپ ءوتۋ 21-ناۋرىز كۇنى ساعات 12:00-دە ورتالىق الاڭداعى «ارمىسىڭ، ءاز ناۋرىز!» كونسەرتتىك باعدارلاماسىنان باستالادى. بۇل كۇنى قالا حالقى مەن قوناقتارى ۇلتتىق سپورت ويىندارىنا قاتىسىپ، «قولونەر - سىرلى ونەر» اتتى قولونەرشىلەردىڭ جارمەڭكەسىن تاماشالاي الادى.

مەرەكەلىك ءىس-شارالار حالىق كوپ جينالاتىن ورىنداردا دا ۇيىمداستىرىلماق. ماسەلەن، 19-شاعىن اۋدانداعى «سيتي- مولل» ساۋدا ورتالىعىنىڭ جانىندا «ناۋرىز مەرەكەم - ناۋرىز بەرەكەم» اتتى كونتسەرتتىك باعدارلاما وتەدى.

«جۇمىسشى» كەنتىندە، «بىلعارى زاۋىتى» شاعىن اۋدانىندا ناۋرىز مەرەكەسى وسى كۇنى مەكتەپتەردىڭ جانىندا ءسان- سالتاناتىمەن مەرەكەلەنەدى.

نەگىزگى مەرەكەلىك باعدارلاما 22-ناۋرىزعا جوسپارلانعان. بۇل كۇنى تەاترلاندىرىلعان كونسەرتتىك باعدارلاما ورتالىق الاڭدا ساعات 11:00-دە باستالماق.

«ۇلى دالانىڭ ۇلتتىق ويىندارى» سپورتتىق ويىندارى ۇيىمداستىرىلىپ، قولونەرشىلەر ءوز بۇيىمدارىن كورەرمەن نازارىنا ۇسىنادى.

مەرەكەنىڭ اجارىن باۋىرساق-fest اشا تۇسپەك. بۇل كۇنى تۇرعىندار باۋىرساقتىڭ ءتۇر-ءتۇرىنىڭ ءدامىن تاتا الادى. سونداي-اق، باۋىرساق جەۋدەن جارىسقا تۇسەدى.

بالالار دا ۇمىت قالماعان، ولار ءۇشىن ءتۇرلى سايىستار، ۆيكتورينالار ۇيىمداستىرىلماق. «بەرەكە» شاعىن اۋدانىنىڭ تۇرعىندارى ءۇشىن №25-مەكتەپتىڭ جانىندا مەرەكەلىك ءىس- شارا وتەدى. ال، تۇستەن كەيىن ورتالىق الاڭدا «ساعىندىرعان اندەر-اي» رەترو-كونسەرتى جوسپارلانعان.

23-ناۋرىزدا ورتالىق الاڭعا جينالعان حالىق «ۇلىستىڭ ۇلى كۇنى - ناۋرىز» باعدارلاماسىن تاماشالاي الادى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى