قىركۇيەكتەن باستاپ كوللەدج ستۋدەنتتەرىنىڭ شاكىرتاقىسى وسەدى
بۇل تۋرالى «اشىق» ن ق ا پورتالىندا جاريالانعان ۇكىمەت قاۋلىسىنىڭ جوباسىندا جازىلعان، دەپ حابارلايدى قازاقپارات ءتىلشىسى.
«تەحنيكالىق جانە كاسىپتىك ءبىلىمنىڭ ءبىلىم بەرۋ باعدارلامالارىن ىسكە اسىراتىن ءبىلىم بەرۋ ۇيىمدارىندا جۇمىسشى بىلىكتىلىكتەرى بويىنشا وقيتىن ستۋدەنتتەرگە - 32681 تەڭگە. تەحنيكالىق جانە كاسىپتىك (ورتا بۋىن ماماندارىن دايارلاۋدى كوزدەيتىن)، ورتا بىلىمنەن كەيىنگى ءبىلىمنىڭ ءبىلىم بەرۋ باعدارلامالارىن ىسكە اسىراتىن ءبىلىم بەرۋ ۇيىمدارىندا ءبىلىم الاتىن ستۋدەنتتەردىڭ مەملەكەتتىك ستيپەندياسى - 31422 تەڭگە»، - دەلىنگەن قۇجاتتا.
قاۋلى جوباسىنا قوسىمشا بەرىلگەن تۇسىندىرمەدە بۇل باستامانىڭ كوللەدج ستۋدەنتتەرىنىڭ الەۋمەتتىك جاعدايىن جاقسارتۋعا جانە تەحنيكالىق كادرلاردى دايارلاۋ ساپاسىن ارتتىرۋعا باعىتتالعانى جازىلعان.
«ق ر پرەزيدەنتىنىڭ «ادىلەتتى قازاقستان: ءبارىمىز جانە ءارقايسىمىز ءۇشىن. قازىر جانە ءاردايىم» 3.1 «قولجەتىمدى جانە ساپالى ءبىلىم» باعىتى بويىنشا سايلاۋالدى باعدارلاماسىن ىسكە اسىرۋ جونىندەگى ءىس- قيمىل جوسپارىنىڭ 87-تارماعىندا «ستۋدەنتتەر ستيپەنديالارىنىڭ مولشەرىن 2 ەسەگە ۇلعايتۋ» قاراستىرىلعان. سونداي- اق 2023 -جىلعى 1-قىركۇيەكتەن باستاپ ستيپەنديانى ۇلعايتۋ بويىنشا بيۋدجەت قاراجاتىن رەسپۋبليكالىق بيۋدجەت كوميسسياسى قولدادى. جالپى ستيپەنديا مولشەرىن ۇلعايتۋ ەل جاستارى ءۇشىن تەحنيكالىق جانە كاسىپتىك ءبىلىم بەرۋدىڭ تارتىمدىلىعىن ەداۋىر ارتتىرادى، كوللەدج ستۋدەنتتەرىنىڭ الەۋمەتتىك جاعدايىن جاقسارتادى جانە تەحنيكالىق جانە كاسىپتىك ءبىلىمى بار كادرلاردى دايارلاۋ ساپاسىنىڭ ارتۋىنا اسەرىن تيگىزەدى»، - دەپ تۇسىندىرمە بەرىلگەن قاۋلىعا.
ايتا كەتەيىك، قازىر جۇمىسشى بىلىكتىلىكتەرى بويىنشا وقيتىن كوللەدج ستۋدەنتتەرىنىڭ شاكىرتاقىسى - 21787 تەڭگە. ال ورتا بۋىن ماماندارىن دايارلايتىن ءبىلىم بەرۋ ۇيىمدارىندا وقيتىنداردىڭ مەملەكەتتىك ستيپەندياسى 20948 تەڭگە كولەمىندە.
«وسى قاۋلى العاشقى رەسمي جاريالانعان كۇنىنەن باستاپ قولدانىسقا ەنگىزىلەدى جانە 2023 -جىلعى 1 قىركۇيەكتەن باستاپ تۋىنداعان قاتىناستارعا قولدانىلادى»، - دەپ جازىلعان قۇجاتتا.
قاۋلى جوباسى 30-ناۋرىزعا دەيىن اشىق تالقىلاۋدا بولادى.
