قازاقستاننىڭ اراب ەلدەرى جونىندەگى زەرتتەۋشىلەرى ب ا ءا- گە شاقىرىلدى
ە. ءابىل جۇمىس ساپارىمەن انۋار گارگاش ديپلوماتيالىق اكادەمياسىنا (AGDA) جانە مۋحاممەد بين راشيد مەملەكەتتىك باسقارۋ مەكتەبىنە (MBRSG) باردى.
العاشقى كەزدەسۋ انۋار گارگاش ديپلوماتيالىق اكادەمياسىنىڭ باس ديرەكتورى نيكولاي ملادەنوۆپەن ءوتتى. ونىڭ بارىسىندا ىنتىماقتاستىقتىڭ نەگىزگى باعىتتارى، اتاپ ايتقاندا، ديپلوماتيا جانە مەملەكەتتىك باسقارۋ سالاسىندا بىرلەسكەن زەرتتەۋلەر جۇرگىزۋ، وقىتۋشىلىق قۇراممەن الماسۋ جانە ءبىلىم الۋشىلارعا ارنالعان تاعىلىمداما ۇيىمداستىرۋ، مەملەكەتتىك قىزمەتشىلەردىڭ بىلىكتىلىگىن ارتتىرۋ سالاسىندا تاجىريبە الماسۋ ماسەلەلەرى تالقىلاندى.
انۆار گارگاش ديپلوماتيالىق اكادەمياسى پارسى شىعاناعىنداعى اراب ەلدەرى جونىندە زەرتتەۋ جۇرگىزەتىن قازاقستاندىق زەرتتەۋشىلەردى بىرىككەن اراب امىرلىكتەرىنە، ال ورتالىق ازيا ەلدەرىنە قىزىعۋشىلىعى بار ءوز اكادەمياسىنىڭ پروفەسسورلارىن قازاقستانعا جىبەرۋدى ۇسىندى.
ەستەرىڭىزگە سالا كەتەيىك، 2023-جىلدىڭ قاڭتار ايىندا مەملەكەت باسشىسىنىڭ ب ا ءا- گە رەسمي ساپارى بارىسىندا ەكى وقۋ ورنى اراسىندا ىنتىماقتاستىق تۋرالى مەموراندۋمعا قول قويىلعان ەدى.
اكادەميا رەكتورىنىڭ ساپارى بارىسىنداعى ەكىنشى كەزدەسۋى مۋحاممەد بين راشيد مەكتەبىنىڭ پرەزيدەنتى الي ال مارريمەن ءوتتى.
«مۋحاممەد بين راشيد مەكتەبىنىڭ باسشىسىمەن «Public Administration» ، «Public Policy» ماگيسترلىك باعدارلامالارى بويىنشا قوس ديپلومدىق ورتاق باعدارلاما اشۋ، ءبىلىم الۋشىلار مەن پروفەسسورلىق قۇرام اراسىندا اكادەميالىق الماسۋ باعدارلامالارىن ۇيىمداستىرۋ، ورتاق زەرتتەۋلەر جۇرگىزۋ، سونداي-اق مەملەكەتتىك قىزمەتشىلەردىڭ بىلىكتىلىگىن ارتتىرۋ باعىتىنداعى تاعىلىمدامالاردى ۇيىمداستىرۋ ماسەلەلەرىن تالقىلادىق»، - دەدى ەرلان ءابىل.
كەزدەسۋلەر سوڭىندا انۆار گارگاش ديپلوماتيالىق اكادەمياسى جانە مۋحاممەد بين راشيد مەكتەبى باسشىلىعى اكادەميانىڭ ۇيىمداستىرۋىمەن 2023-جىلدىڭ 27-28- ساۋىرىندە وتەتىن جىل سايىنعى حالىقارالىق عىلىمي كونفەرەنتسياعا شاقىرىلدى.
