سەنات سوتتالعان ايەلدەرگە قاتىستى زاڭناماعا تۇزەتۋ ەنگىزدى
سەنات دەپۋتاتتارى جاڭا نورمالاردى كونتسەپتۋالدى تۇرعىدا قولداي وتىرىپ، زاڭ جوباسىنا ءبىرقاتار تۇزەتۋ ەنگىزىپ، ونى تولىقتىرۋلارمەن قابىلداندى، دەپ حابارلايدى قازاقپارات ءتىلشىسى.
قۇجاتقا ەنگىزىلگەن تۇزەتۋلەر مەملەكەت باسشىسىنىڭ جولداۋلارى كەزىندە بەرىلگەن تاپسىرمالاردى ىسكە اسىرۋعا، قىلمىستىق، قىلمىستىق-پروتسەستىك جانە قىلمىستىق-اتقارۋ كودەكستەرىنىڭ نورمالارىن جەتىلدىرۋگە ارنالعان. سەنات ەنگىزگەن 45 تۇزەتۋدىڭ قاتارىندا ازاپتاعانى ءۇشىن جاۋاپكەرشىلىكتى كۇشەيتۋگە، قاتىگەز، ادامگەرشىلىككە جاتپايتىن نەمەسە قادىر-قاسيەتىن قورلايتىن قارىم-قاتىناس ءۇشىن قىلمىستىق جاۋاپكەرشىلىكتى ەنگىزۋگە، وتباسىنداعى زورلىق-زومبىلىق جانە تاعى باسقا دا ماسەلەلەرگە قاتىستى نورمالار بار.
قۇجاتتى تالقىلاۋ كەزىندە ق ر ىشكى ىستەر ءمينيسترى مارات احمەتجانوۆ تۇرمەدە بالامەن وتىرعان ايەلدەرگە قاتىستى زاڭعا وزگەرىس ەنگىزىلەتىنىن ايتتى.
«قىلمىستىق-اتقارۋ كودەكسىندە سوتتالعان ايەلدەردىڭ بالالارىمەن ءۇش جاسقا تولعانعا دەيىن كولونيالاردا بولۋى كوزدەلگەن (ق ا ك 116-بابى).
ەلىمىزدە وسىنداي 1 كولونيا بار. وندا بارلىق جاعدايلار جاسالعان. بۇلدىرشىندەر بالالار ۇيىنە ورنالاستىرىلادى. ايەلدەر بالالارىن شەكتەۋسىز، جۇمىستان بوس ۋاقىتتا كورە الادى. الايدا ءۇش جاسقا تولعاننان كەيىن، بالالار جاقىن تۋىستارىنا نەمەسە بالالار ۇيلەرىنە بەرىلەدى. وسى ورايدا الەۋمەتتىك بايلانىستاردى ساقتاۋ ماقساتىندا سوتتالعان ايەلدەرگە بالاسىن 4 جاسقا دەيىنگى قالدىرۋعا مۇمكىندىك بەرەتىن نورما ەسكەرىلگەن. ءبىراق مۇنىڭ ءبىر شارتى بار، ياعني ايەل ادامنىڭ بوساتىلۋىنا دەيىن ءبىر جىلدان از ۋاقىت قالۋى ءتيىس»، - دەدى مينيستر.
ءوز كەزەگىندە سەنات ءتوراعاسى ماۋلەن اشىمبايەۆ اتالعان زاڭعا قاتىستى پىكىر ءبىلدىردى.
«پرەزيدەنت ادام قۇقىقتارى جانە زاڭ ۇستەمدىگى بويىنشا قابىلدانۋى قاجەت شارالاردى ايقىنداپ بەردى. بۇگىن قابىلدانعان زاڭ ادامنىڭ قىلمىستىق سوت تورەلىگى، جازانى اتقارۋ جانە ازاپتاۋلار مەن قاتىگەز ءىس-ارەكەتتەردىڭ الدىن الۋ سالاسىنداعى قۇقىقتارىن كۇشەيتۋگە ارنالعان. ونىڭ ىشىندە اۋىر سىرقاتقا شالدىققانداردىڭ، كىشكەنتاي بالاسى بار انالاردىڭ، العاش رەت سوتتالعانداردىڭ قۇقىقتارىن قامتاماسىز ەتۋ ماسەلەلەرى قامتىلعان. الداعى ۋاقىتتا زاڭ ادام قۇقىقتارى مەن بوستاندىقتارىن قورعاۋ تەتىكتەرىن جەتىلدىرۋگە وڭ اسەرىن تيگىزەدى دەپ سەنەمىز»، - دەدى م. اشىمبايەۆ.
