سەناتور گۇلميرا كارىموۆانىڭ ولىمىنە قاتىستى قىلمىستىق ءىس قوزعالمادى - مينيستر
بۇگىن سەناتتىڭ جالپى وتىرىسىنان كەيىن تىلشىلەر مينيستردەن سوتقا دەيىنگى تەرگەپ-تەكسەرۋلەردىڭ ءبىرىڭعاي تىزىلىمىندە دەپۋتات گۇلميرا كارىموۆانىڭ ولىمىنە قاتىستى دەرەكتى تىركەۋ جانە وسى بويىنشا قىلمىستىق ءىس قوزعاۋ جايىندا سۇرادى.
«ەلىمىزدە سوتقا دەيىنگى تەرگەپ-تەكسەرۋلەردىڭ ءبىرىڭعاي ءتىزىلىمى اياسىندا دەرەكتەر قامتىلادى. وسى ورايدا كەز كەلگەن ارىز تىركەلەدى. ادام ولىمىنە قاتىستى قاتىستى ارنايى زەرتتەۋلەر مەن ساراپتامالار قامتىلادى»، - دەدى م. احمەتجانوۆ.
ونىڭ ايتۋىنشا، اتالعان ءىس-قيمىلداردى جۇزەگە اسىرۋ ءۇشىن سوتقا دەيىنگى تەرگەپ-تەكسەرۋلەردىڭ ءبىرىڭعاي تىزىلىمىندە تىركەلەدى.
«ەشقانداي قىلمىستىق ءىس قوزعالمادى. بۇل دەرەك سوتقا دەيىنگى تەرگەپ-تەكسەرۋلەردىڭ ءبىرىڭعاي تىزىلىمىندە بار. ول بويىنشا تەكسەرۋ جۇرگىزىلىپ جاتىر، سونداي-اق ءولىم سەبەبىن انىقتاۋ ماقساتىندا سوت-مەديتسينالىق ساراپتاما ەسكەرىلگەن. وسىنىڭ بارلىعى قالىپتى ءراسىم سانالادى. ياعني، كەز كەلگەن ارىز تىركەلىپ، ول بويىنشا ءتيىستى تەكسەرۋ جۇرگىزىلەدى. ءولىم سەبەبى انىقتالماسا، ساراپتاما جاسالادى، ال سوتقا دەيىنگى تەرگەپ-تەكسەرۋلەردىڭ ءبىرىڭعاي تىزىلىمىندە تىركەۋسىز ساراپتاما جۇرگىزۋ مۇمكىن ەمەس»، - دەدى مينيستر.
ەسكە سالايىق، 27- قاڭتاردا سەناتور گۇلميرا كارىموۆا كەنەتتەن قايتىس بولدى.
وعان الدىن الا «انافيلاكتيكالىق شوك» دياگنوزى قويىلعان ەدى.
دەگەنمەن كەيىن استانا قالالىق قوعامدىق دەنساۋلىق ساقتاۋ باسقارماسى 45 جاسىندا كوز جۇمعان گۇلميرا كارىموۆانىڭ ولىمىنە جۇرەك تالماسى سەبەپ بولعانىن ءمالىم ەتتى.
