ساباققا كەلمەگەن بالانى تەكسەرۋگە ۇيىنە بارعان پوليتسەي ءبىر وتباسىن قۇتقارىپ قالدى

تاراز قالاسى پوليتسيا باسقارماسى 2-پوليتسيا ءبولىمىنىڭ كامەلەتكە تولماعاندار جونىندەگى ۋچاسكەلىك پوليتسيا ينسپەكتورى الىشەر ەرمەكوۆتىڭ ايتۋىنشا، مەكتەپ ديرەكتورىنىڭ تاربيە جونىندەگى ورىنباسارى ەلميرا ەسەلبايەۆامەن بىرگە وقۋشىنىڭ ساباققا كەلمەۋ سەبەبىن ءبىلۋ ءۇشىن ۇيىنە بارعان. مەكتەپكە كەلمەگەن 8 جاستاعى بالانىڭ اتا-اناسى قوڭىراۋعا جاۋاپ بەرمەگەن. مەكەنجايعا كەلگەن پوليتسيا ينسپەكتورى قاقپانى قاققاندا دا ونى ەشكىم اشپاعان. كورشىلەردەن سۇراعاننان كەيىن، كەشەدەن بەرى وتباسىن ەشكىم كورمەگەنى بەلگىلى بولعان. الىشەر ەرمەكوۆ وسى ءۇيدىڭ كورشىسىنىڭ رۇقساتىمەن اۋلاعا كىرگەن.

«ۇيگە كەلە جاتىپ، تەرەزەدەن بالانىڭ ەدەندە ەس- ءتۇسسىز جاتقانىن كوردىك. ويلانباستان تەرەزەنى سىندىرىپ، بولمەگە كىردىم. ۇيدە كاۋستيكالىق ءيىس بولدى، تۇرعىنداردىڭ كومىرتەگى توتىعىمەن دەم العانىن ءتۇسىندىم. بىردەن گازدى جاۋىپ، بارلىق تەرەزەنى اشتىم»، - دەدى الىشەر ەرمەكوۆ.

بارلىق بولمەنى ارالاپ شىققان پوليتسيا قىزمەتكەرى 58 جاستاعى ەر ادامدى، ونىڭ 47 جاستاعى ايەلىن، ولاردىڭ 12 جانە 10 جاستاعى قىزدارىن، 8 جاستاعى ۇلىن كوشەگە شىعارعان. پوليتسەي زارداپ شەككەندەرگە دارىگەرگە دەيىنگى قاجەت كومەكتى كورسەتىپ، كەيىن جەدەل مەديتسينالىق جاردەم قىزمەتكەرلەرىنە تاپسىرعان. وتباسى دەرەۋ اۋرۋحاناعا جاتقىزىلعان. دارىگەرلەردىڭ ايتۋىنشا، ولارعا كومەك ءسال كەشىككەندە، ەشكىمدى قۇتقارۋ مۇمكىن بولماس ەدى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى