بالا كەزىمدە ەتىك جوندەۋگە قىزىعاتىن ەدىم - اتىراۋلىق ەتىكشى كەلىنشەك
قۋىرشاقپەن ويناۋدان گورى اۋلاداعى گاراجدا تەمىر- تەرسەكتەردى شۇقىلاپ، اياقكيىم جوندەۋدى ۇناتقان. سول كەزدە ءسىڭلىسىنىڭ سپورتتىق اياقكيىمىن جوندەپ بەرگەن. ارعى اتالارىنىڭ كاسىبىن قايتا جاڭعىرتقان ول ەتىك جوندەۋدى قالاي باستاعانىن ايتىپ بەردى، دەپ حابارلايدى قازاقپارات ءتىلشىسى.
كىندىك قانى ماڭعىستاۋ وڭىرىندە تامعان. بالالىق شاعىن اقتوبە وبلىسىنىڭ رەسەيمەن شەكاراداعى مارتوك اۋدانىندا وتكىزگەن. 2002 -جىلى اتىراۋ وبلىسىنىڭ جىگىتىنە تۇرمىسقا شىعىپ، سودان بەرى ماقات كەنتىندە تۇرادى.
«بالا كەزىمدە قۇربىلارىم سەكىلدى قۋىرشاقتى قۇشاقتاپ، سارى شاشىن تاراۋعا ىنتام بولا قويعان جوق. اۋلاداعى گاراجدا تەمىر- تەرسەكتى اۋدارىپ- توڭكەرۋ، اياقكيىمدى جوندەۋ سەكىلدى ىستەر ۇنايتىن. سول كەزدە ءسىڭلىمنىڭ سپورتتىق اياقكيىمىن جوندەپ بەرەتىن ەدىم. ەتىكشىلىك - ارعى اتالارىمىزدان كەلە جاتقان كاسىپ»، - دەيدى گۇلدانا حاۋاشيەۆا.
ول ەتىكشىلىك كاسىپتى 2006 -جىلى باستاعان. تاپسىرىس بەرۋشىلەردىڭ اياقكيىمىن ءوز ۇيىندە جوندەگەن. العاشقىدا ونىڭ بۇل ىسىنە تاڭدانىس بىلدىرگەندەر از بولماپتى. ءبىراق، كەيىن كۇدىكپەن قاراعاندار اياقكيىمىن ءجيى جوندەتكەن.
ال، 2010 -جىلى جەكە كاسىبىن اشۋ ءۇشىن ماقات كەنتىندەگى بازار اۋماعىنان دۇڭگىرشەكتى جالداعان. قىتاي وندىرىسىنەن شىققان «ۆەرسال» ماركالى تىگىن ماشينكەسى بار.
«قاي ءىستى دە ىنتامەن اتقارعاندا عانا جەمىستى بولارىنا كوزىم جەتتى. كەيدە شارشايتىن، دەنساۋلىققا كوڭىل بولەتىن ءسات كەزدەسەدى. سوندايدا كۇيەۋىم دە، بالالارىم دا كومەكتەسەدى. ءتىپتى قايىناعالارىمنىڭ بالالارى ەتىكشىلىكتى مەنەن ۇيرەنۋگە نيەت ءبىلدىردى. تاپسىرىس بەرۋشىلەردىڭ ءتىزىمى جازىلعان 10 عا جۋىق قالىڭ داپتەرىم بار. ەتىگىن جوندەتكەن جانداردىڭ ەشقايسىسى رەنىشىن بىلدىرگەن جوق. ويتكەنى كليەنتتەرىمنىڭ ەتىگىن ساپالى جوندەۋگە ءمان بەرەمىن»، - دەپ اڭگىمەلەدى ەتىكشى.
ءقازىر گۇلدانا حاۋاشيەۆانىڭ شاعىن شەبەرحاناسىن اشقان. وعان تاپسىرىس بەرۋشىلەردىڭ ءبىرى كىرىپ، ەكىنشىسى شىعىپ جاتادى. ويتكەنى ەتىكشى كەلىنشەك اياقكيىمدى جوندەۋمەن شەكتەلمەي، تۇتىنۋشىنىڭ قالاعان تۇسىنە بوياۋدى قولعا العان. ءتۇرلى كىلتتىڭ كوشىرمەسىن اينىتپاي جاساپ بەرەدى.
«ەتىكشى بولۋ وڭاي ەمەس. كۇنىنە 30 عا جۋىق تاپسىرىس تۇسەدى. تاپسىرىس بەرۋشىلەردىڭ تالعامى ءارتۇرلى عوي. ءبارى دە جوندەۋگە تاپسىرعان ەتىگىنىڭ جاڭادان كەم بولماعانىن، ءبىرى تاعاسىن، ەندى ءبىرى سىرماسىن جاڭارتىپ بەرۋدى قالايدى. كەيبىر ەتىكتىڭ جىرتىعىن جاماپ، ۇلتانىن اۋىستىرۋ، بوياۋ سەكىلدى جۇمىستاردى اتقارۋعا توزىمدىلىك قاجەت» ، - دەيدى ول.
ونىڭ اياقكيىم تىگۋدى قولعا الماق نيەتى بار. كۇيەۋىنە ارناپ كۇزگى ماۋسىمعا ارنالعان باتەڭكە تىگىپ بەرگەن. باتەڭكەنىڭ ولشەمى - 43. ءبىراق اياقكيىمگە قاجەتتى بىلعارى، ۇلتان، ءتىپتى كاپرون ءجىپتى تاپشىلىعى الاڭداتادى. مۇنىڭ ءبارىن وزگە ەلدەن الدىرادى.
«ەلىمىزدە بىلعارى وڭدەۋ ءوندىرىسى جاندانباي تۇر. بىلعارى وزىمىزدە وڭدەلسە، وتاندىق ءونىمدى قۋانا الار ەدىك. ويتكەنى ەتىكشىلەرگە ساپالى بىلعارى وتە قاجەت»، - دەيدى گۇلدانا حاۋاشيەۆا.
