عاسىر جاساعان قاراعاندىلىق كەيۋانا ءالى كۇنگە دەيىن قار كۇرەيدى
اباي اۋدانىنىڭ ەڭ ەگدە تۇرعىنى، 102 جاستاعى قاريا ءسابيلا ورمانبايەۆاعا قاراپ، قۇلايعىر اۋىلىنىڭ حالقى وي مەن بوي تۇزەيدى. زەينەتكەردىڭ تاڭى قىستا ءۇي اۋلاسىنىڭ قارىن تازالاۋمەن باستالادى.
ول جاسىنان ەڭبەككە ارالاسىپ، قارا جۇمىستىڭ قازانىندا قايناعان. 30-جىلداردىڭ الاساپىرانىندا ەگىن سالدى، شابىندىققا شالعى سىلتەدى، ءشوپ ءۇيدى. 17 جاسىندا قۇلايعىر اۋىلىندا ساۋىنشى بولىپ ەڭبەك ەتەدى. كۇنىنە 30 دان استام سيىر ساۋاتىن بولعان. جاڭا بۇزاۋلاعان اساۋ قۇناجىنداردى تىك تۇرعىزىپ، ۇيرەتىپ بەرۋ دە قارشاداي قىزعا مىندەتتەلگەن.
«ءبىز تاڭەرتەڭ ەرتە تۇراتىنبىز، ويتكەنى 30 دان استام سيىردى ساۋىپ ۇلگەرۋ كەرەك بولاتىن. مەن ساۋىنشى قىزداردىڭ قاتارىندا ەڭ جىلدام بولدىم جانە ساۋعان ءسۇتىم تازا بولاتىن. سوندىقتان، مەن ەكى ەسە كوبىرەك جالاقى الدىم. جۇمىس تالعامايتىنمىن، بارلىعىن ىستەپ جۇرە بەرەتىن ەدىم»، - دەيدى ءسابيلا اپا.
ءسابيلا ورمانبايەۆا 9 بالامەن جەسىر قالعان. كۇندىز كولحوزدىڭ تىرلىگى، تۇندە ءۇيدىڭ شارۋاسىمەن اينالىسىپ، ۇرشىق ءيىرىپ، كيىم توقىپ، پەرزەنتتەرىن جەتكىزگەن. عاسىر جاساعان انا «وسى ۋاقىتقا دەيىن تىڭ بولۋى تىنىمسىز تىرلىكتىڭ ارقاسى» ەكەنىن ايتادى.
«ءارقاشان جۇمىستان ۇيگە جۇگىرەتىنمىن. ءتىپتى، كورشىلەرگە بارىپ، شاي ىشۋگە ۋاقىت بولمايتىن. مەن ءۇشىن باستى ماقسات - بالالارىمدى تاربيەلەپ، جەتكىزۋ بولدى»، - دەپ ەسكە الادى زەينەتكەر.
وزات ساۋىنشى زەينەتكەرلىككە شىققان سوڭ دا بۇل كاسىپتەن كەتپەگەن. ءىرى قارا ۇستاپ، 100 جاسىنا دەيىن سيىر سۋىپ، ءونىمىن جاراتقان ەكەن.
«بىلتىرعا دەيىن ەكى سيىر ساۋدىم، بۇل مەن ءۇشىن ەش قيىن بولعان جوق. مەن قازىر دە ءۇيدى جيناپ، پەش جاعىپ، ەدەن جۋامىن، قول قۋسىرىپ وتىرعاندى ۇناتپايمىن»، - دەيدى زەينەتكەر اپا.
ءسابيلا ورمانبايەۆا ەڭبەك داڭقى وردەنىنىڭ يگەرى. «التىن القا» جانە «انا داڭقى» مەدالمەن ماراپاتتالعان. ەلىمىزدە وتكىزىلەتىن ساياسي ماڭىزدى وقيعالاردان تىس قالمايدى. قۇلايعىر اۋىلىنىڭ ەڭ ۇلكەن تۇرعىنى جەرلەستەرىنە ۇلگى بولىپ، سايلاۋدا داۋىس بەرۋگە ءبىرىنشى بولىپ بارادى ەكەن.
«دەنساۋلىق جاراپ تۇرسا، كوڭىل-كۇيىم دە كوتەرىلەدى. مەن ەشقاشان اۋىرمادىم، ۋكولداردان قورقامىن. ءبىراق، قازىر قاجەت بولعان جاعدايدا ءدارى ىشەمىن»، - دەيدى ءسابيلا اپا.
ەڭبەك ادامى بۇگىندە جاپىراعىن جايعان بايتەرەككە اينالدى. پەرزەنتتەرى - ءبىر-ءبىر سالانىڭ مىقتى مامانى. بۇگىندە 25 نەمەرە، 6 شوبەرە ءسۇيىپ وتىر.
«ەندى شوپشەگىمنىڭ الاقانىنان سۋ ىشسەم، ارمانىم جوق»، - دەيدى باتىر انا.
اۆتور
اگاتا مۋحامەدجانوۆا
