ءبىر اپتا ازىق- تۇلىك جوق: بالقاش ماڭىنداعى اۋىل قار قۇرساۋىندا قالدى
ەلدى مەكەندەگى 30 وتباسى ءتىپتى، ءبىر اپتا بويى ازىق- تۇلىككە قول جەتكىزە الماي، قيىندىق كورگەن، دەپ حابارلايدى قازاقپارات ءتىلشىسى.
بەكتاۋ اتا اۋىلىنا بالقاش- قاراعاندى تراسساسىمەن توزىعى جەتكەن اسفالت اپارادى. ول كەڭەس زامانىندا سالىنعان. ونىڭ ۇزىندىعى نەبارى 12 شاقىرىمدى قۇرايدى. سوڭعى بەس جىلدا بۇل اۋماق قار قۇرساۋىندا قالىپ كەلەدى. اقپان ايىنىڭ وزىندە تۇرعىندار اپتاعا جۋىق ۋاقىت قالاعا قاتىناۋدان قالعان. سونىمەن قاتار بۇل اۋماقتا ۇيالى بايلانىس تا ناشار. بوراندا قالىپ قويعاندار قۇتقارۋشىلارعا نەمەسە باسقا دا شۇعىل قىزمەتتەرگە جەدەل حابارلاسا المايدى. ال جەرگىلىكتى بەلسەندىلەردىڭ ايتۋىنشا، اقتوعاي اۋدانى اكىمدىگىنىڭ وكىلدەرى بۇل ماسەلەگە كوز جۇما قاراپ وتىر.
«ءبىر اپتا قار باستى جولدى. ءوزىم 66 ماركالى ۇلكەن تەحنيكامەن تۇرعىندارعا كەرەك- جاراقتى جەتكىزىپ تۇردىم. جەڭىل كولىك تۇرماق، دجيپتاردىڭ ءوزى قاتىناي المايدى. قازىر جولدى اشقان. ءبىراق جاعداي تاعى قايتالانا ما دەگەن ۇرەيدەمىز. وسى جاعداي قايتالانباسا ەكەن»، - دەيدى بەكتاۋ اتا تۇرعىنى ۇلان مالىبەك.
اقتوعاي اۋدانىنىڭ اكىمدىگى تۇرعىندار شاعىمىنا جاۋاپ بەردى.
«قاتتى بوران سالدارىنان جولداردى جابۋ ورىن العان. بارلىق جۇمىستار جۇرگىزىلۋدە»، - دەدى اقتوعاي اۋدانى اكىمىنىڭ ورىنباسارى سايان مۇرات ۇلى.
ايتا كەتەيىك، جەرگىلىكتى تۇرعىندار بىرەر كۇن بۇرىن وسى ماسەلەگە قاتىستى بەيبىت شەرۋ ۇيىمداستىرۋدى جوسپارلاعان. جاعدايدان حاباردار بولعان بيلىك ماسەلەنى بىردەن نازارعا الىپ، قار كۇرەۋگە جەدەل تەحنيكا دا تاپقان. «تاعى كۇن بوراتىپ، جولدى قار باسسا، اۋدان اكىمدىگى اۋىل حالقىنىڭ جايىن ءجىتى نازاردا ۇستاسا»، - دەپ ءوتىنىش بىلدىرەدى اۋىل جۇرتى.
