بۇقتىرمادا كولىگى مۇز استىنا كەتىپ، جولاۋشىنىڭ كوز جۇمۋىنا سەبەپكەر بولعان جۇرگىزۋشىگە سوت ۇكىمى شىقتى
بىلتىر 6-جەلتوقسان كۇنى ساعات 19.40 كەزىندە سامار اۋدانىنداعى بۇقتىرما سۋ قويماسىندا 5 ادام وتىرعان كولىك مۇز استىنا قۇلاعان. تورتەۋى كولىكتەن شىعىپ ۇلگەرىپ، 72 جاستاعى ايەل سۋعا باتىپ كەتكەن ەدى.
الايدا ايەلدىڭ دەنەسى بىردەن تابىلمادى. سۇڭگۋىرلەرگە اۋانىڭ تومەن تەمپەراتۋراسى مەن سۋ استىنداعى قاراڭعىلىق قيىندىق كەلتىرگەن. 8-جەلتوقساندا تۇسكى ۋاقىتتا ايەلدىڭ دەنەسى تابىلدى. سول كەزدە بارلىعى 9 رەت سۋ استىنا ءتۇسۋ جۇمىستارى جۇرگىزىلدى.
وسى وقيعادان سوڭ Mersedes كولىگىنىڭ جۇرگىزۋشىسىنە قاتىستى سوتقا دەيىنگى تەرگەۋ امالدارى قولعا الىندى. بەلگىلى بولعانداي، زايسان اۋدانىنا قاراي بارا جاتقان ەر ادام مۇز ۇستىندە جۇرۋگە تىيىم سالاتىن بەلگىنى مۇلدە ەلەمەگەن. سونىڭ سالدارىنان كولىك مۇز استىنا قۇلادى. تەرگەۋ امالدارى اياقتالعان سوڭ ءىس سامار اۋداندىق سوتىندا قارالىپ، 2-ناۋرىز كۇنى ۇكىم شىقتى.
«ايىپتالۋشى ق ر قىلمىستىق كودەكسىنىڭ 345-بابى 3-بولىگىمەن (ابايسىزدا ادام ولىمىنە اكەپ سوققان جول قوزعالىسى ەرەجەلەرىن بۇزۋ) كىنالى دەپ تانىلدى. سوتتالۋشىنىڭ اسىراۋىندا كامەلەتكە تولماعان بالاسىنىڭ بارى ەسكەرىلدى. سوت شەشىمىمەن ول 2 جارىم جىلعا تۇرمەگە قامالىپ، بەس جىلعا كولىك جۇرگىزۋ قۇقىعىنان ايىرىلدى. ۇكىم ءالى زاڭدى كۇشىنە ەنگەن جوق»، - دەپ حابارلادى سوتتىڭ باسپا ءسوز قىزمەتى.
