ديماش قۇدايبەرگەن تۋرالى مەكسيكا راديوسىندا ارنايى باعدارلاما شىقتى

ديماشتىڭ اندەرى مەكسيكا راديوسىندا العاش رەت 7-اقپاندا ايتىلدى. بۇل ءارتىستىڭ «Mafia Dear» حالىقارالىق فان- كلۋبىنىڭ ارقاسىندا مۇمكىن بولدى.

ەفير تىڭداۋشىلاردىڭ قىزىعۋشىلىعىن تانىتىپ، وسىدان كەيىن «Andromeda Radio» جۇرگىزۋشىلەرى قازاقستاندىق ورىنداۋشىعا ارنالعان جاڭا باعدارلاما شىعارۋ تۋرالى شەشىم قابىلدادى. كوپ ۇزاماي باعدارلاما «Universo Dimash» («ديماش الەمى» ) اتاۋىن الدى.

جاڭا مۋزىكالىق باعدارلاما ديماشتىڭ شىعارماشىلىعىنا عانا ەمەس، قازاقستاننىڭ مادەنيەتىنە دە ارنالعان. «Andromeda Radio» ءوزىنىڭ 14 جىلعا جۋىق تاريحىندا العاش رەت ءبىر عانا ارتىسكە باعدارلاما ارناپ وتىر.

ەندى «ديماش الەمى» باعدارلاماسى اي سايىن تاراتىلىپ، ول 2 ساعاتقا سوزىلادى. باعدارلامانىڭ ءبىرىنشى شىعارىلىمىندا وتانداسىمىزدىڭ Zhalyn, Screaming, Ikanaide, Durdaraz, Stranger، Daididau, Omir Oter، Samaltau, Mademoiselle Hyde تاعى سول سياقتى اندەرى شىرقالدى. باعدارلامانىڭ جۇرگىزۋشىسى ارگەنتينالىق الەحاندرا دجودجيا.

Andromeda Radio - بۇكىل الەمگە تاراتىلاتىن ونلاين- راديوستانتسيا. راديودا اقش پەن ەۋروپا ەلدەرىنەن 60 تان استام ديكتور حابار تاراتادى. ماقسات - الەمدىك ونەر مەن مادەنيەتتى ناسيحاتتاۋ.

ەسكە سالساق، اقپاننىڭ سوڭىندا مەكسيكا مەتروسىنىڭ 576 مەديافاسادىندا ديماشتىڭ «Kieli meken» ءانىنىڭ بەينەبايانى كورسەتىلە باستاعانى تۋرالى حابارلاعان ەدىك.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى