ساراپشى ءماسليحات دەپۋتاتتىعىنا كانديداتتار ءۇشىن ۇگىت-ناسيحاتتىڭ قاي ءتۇرى ءتيىمدى ەكەنىن ايتتى
بۇل پىكىردى ق ر پرەزيدەنتى جانىنداعى قازاقستاننىڭ ستراتەگيالىق زەرتتەۋلەر ينستيتۋتىنىڭ ەلەكتورالدى ۇدەرىستەردى زەرتتەۋ ءبولىمى جەتەكشىسىنىڭ مىندەتىن اتقارۋشى جانار سانحايەۆا ايتىپ وتىر، دەپ حابارلايدى قازاقپارات ءتىلشىسى.
«قازىر سايلاۋالدى ناۋقاننىڭ ەكىنشى اپتاسى ءوتىپ جاتىر. بۇل كانديداتتاردىڭ كوبى ءوز باعدارلاماسىن بەلسەندى ىلگەرىلەتىپ جاتقانىن كورسەتەدى. ينتەرنەت رەسۋرستارى مەن الەۋمەتتىك جەلىلەرگە كوپ كوڭىل ءبولىنىپ جاتىر. اتالعان قۇرالدار كانديداتتاردىڭ قوعاممەن جۇمىس ىستەۋىنە كەڭ مۇمكىندىك بەرەدى. ءتيىمدى ءارى جىلدام ارەكەت ەتۋدە، سايلاۋالدى باعدارلامالاردىڭ نەگىزگى تەزيستەرىن جەتكىزۋدە الەۋمەتتىك مەديانىڭ پايداسى مول. مىسالى، كانديداتتار تىكەلەي ەفير ارقىلى ءوز باعدارلامالارىن تانىستىرا الادى. الايدا، ءماسليحات دەپۋتاتتىعىنا ۇمىتكەرلەر ءۇشىن سايلاۋالدى ۇگىت ماتەريالدارىن تاراتىپ، ءۇيدى ارالاۋ تەحنولوگياسى وڭ ناتيجە بەرەدى»، - دەدى جانار سانحايەۆا.
ساراپشىنىڭ ايتۋىنشا، ەلەكتوراتقا پارتيالىق باسەكەلەستىك نەعۇرلىم تۇسىنىكتى ءارى جاقىن. بۇل ءبىر مانداتتى كانديداتتارعا ءوز وكرۋگىنىڭ سايلاۋشىلارىمەن بەلسەندى جۇمىس ىستەۋ قاجەتتىلىگىن كورسەتەدى.
«پىكىرتالاس - داۋىس بەرۋشىلەرگە نەگىزگى ماسەلەلەر بويىنشا كانديداتتاردىڭ پوزيتسياسىن سالىستىرۋعا مۇمكىندىك بەرەتىن سايلاۋ ناۋقانىنىڭ ماڭىزدى بولىگى. سوندىقتان ناۋقان بارىسىندا ءارتۇرلى فورماتتاعى پىكىرتالاستاردىڭ ءوتۋى ماڭىزدى. وتكەن پىكىرتالاس پارتيالاردىڭ دايىندىعىنىڭ جاقسى دەڭگەيىن كورسەتتى. جالپى، دەبات قورىتىندىسى بويىنشا بيىل سايلاۋ جارىسى ەلەكتورات ءۇشىن ساياسي باسەكەلەستىك رۋحىندا وتەتىنىن اتاپ وتۋگە بولادى. بارلىق پارتيا جەڭىسكە جەتۋگە مۇددەلى»، - دەيدى ول.
