قازاقستاندا ەسىمىڭىزدى وزگەرتكىڭىز كەلسە، نە ىستەۋ كەرەك؟ نۇسقاۋلىق

ەندەشە، قازاقستاندا كىمدەر ەسىمدەرىن وزگەرتە الادى جانە ول ءۇشىن نە ىستەۋ كەرەك؟ بۇل سۇراققا جاۋاپ بەرۋ ءۇشىن قازاقستان رەسپۋبليكاسى ادىلەت مينيسترلىگىنىڭ سايتىنداعى مالىمەتتەرگە سۇيەندىك.

قازاقستاندا كىمدەر ەسىمدەرىن وزگەرتە الادى؟

16 جاسقا تولعان قازاقستان رەسپۋبليكاسىنىڭ ءاربىر ازاماتى تەگىن، اتىن جانە اكەسىنىڭ اتىن وزگەرتە الادى.

16 جاسقا دەيىنگى بالالاردىڭ ەسىمىن وزگەرتۋ ءۇشىن وتىنىشپەن زاڭدى وكىلدەرى، ياعني بالانىڭ اتا-انالارى جۇگىنەدى. ال 10 جاستان باستاپ بالانىڭ جەكە دەرەكتەرىن وزگەرتۋ ءۇشىن ونىڭ كەلىسىمى تالاپ ەتىلەدى.

ازامات ەسىمدى قانداي سەبەپپەن وزگەرتە الادى؟

«نەكە (ەرلى-زايىپتىلىق) جانە وتباسى تۋرالى» قازاقستان رەسپۋبليكاسى كودەكسىنىڭ 257-بابى بويىنشا، ەسىمدى اۋىستىرۋ ءۇشىن مىناداي سەبەپتەر بولۋى كەرەك:

- ەسىم «ءبىرتۇرلى» ەستىلەدى نەمەسە ونى ايتۋ قيىن؛

- جۇبايىمەن ورتاق تەكتە بولعىسى كەلەدى؛

- اجىراسقاننان كەيىن بۇرىنعى تەگىن قايتارعىسى كەلەدى؛

- اتا-اناسىنىڭ بىرەۋىنىڭ ۇلتىنا سايكەس كەلەتىن ەسىمدى نەمەسە تەكتى تاڭداعىسى كەلەدى (ەگەر اتا-اناسىنىڭ ۇلتى ءارتۇرلى بولسا)؛

- ومىردە قالىپتاسقان ەسىمىن قولدانعىسى كەلەدى؛

- ۇلتتىق ءداستۇر بويىنشا اكەسىنىڭ نەمەسە اتاسىنىڭ تەگىن العىسى كەلەدى؛

- تاربيەلەگەن ادامنىڭ تەگىن العىسى كەلەدى؛

- حيرۋرگيالىق جولمەن تاڭدالعان جىنىسقا سايكەس ەسىمىن وزگەرتكىسى كەلەدى.

ەسىمدى وزگەرتۋ ءۇشىن قاي جەرگە بارۋ كەرەك؟

ەسىمدى اۋىستىرۋ، وزگەرتۋ نەمەسە تۇزەتۋ ءۇشىن قازاقستان رەسپۋبليكاسىنىڭ اۋماعىنداعى كەز كەلگەن تىركەۋشى ورگانعا (ا ح ا ت) ءوتىنىش بەرۋگە بولادى، سونداي-اق، «ازاماتتارعا ارنالعان ۇكىمەت» مەملەكەتتىك كورپوراتسياسى ك ە ا ق-عا ءوتىنىش بەرۋگە نەمەسە «ەلەكتروندىق ۇكىمەت» پورتالى ارقىلى ەلەكتروندىق نىساندا ءوتىنىش جىبەرۋگە بولادى.

قانداي قۇجاتتار كەرەك؟

تاڭدالعان جاڭا ەسىم مەن ەسىمدى وزگەرتۋ سەبەبى كورسەتىلگەن وتىنىشپەن قاتار مىنا قۇجاتتار قاجەت بولادى:

- ءوتىنىش بەرۋشىنىڭ تۋۋ تۋرالى كۋالىگى؛

- نەكە قيۋ تۋرالى كۋالىك؛

- ەگەر ءوتىنىش بەرۋشىنىڭ كامەلەتكە تولماعان بالالارى بولسا، ولاردىڭ تۋۋ تۋرالى كۋالىكتەرى؛

- بالا اسىراپ الۋ تۋرالى كۋالىك؛

- اجىراسۋى تۋرالى كۋالىك؛

- ءوتىنىش بەرۋشىنىڭ سۋرەتى (2 شت)؛

- مەملەكەتتىك باجدى تولەگەنىن كورسەتەتىن كۆيتانسيا.

ءوتىنىش پەن قاجەت قۇجاتتار قابىلدانعان سوڭ ول 30 كۇن قارالادى. ەگەر ءوتىنىش قابىلدانباسا، ازامات سوتقا جۇگىنۋگە قۇقىلى.

Massaget.kz

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى