جەر قويناۋىن پايدالانۋشىلاردى مونيتورينگىلەۋگە ارنالعان پلاتفورما ازىرلەندى

جەر قويناۋىن پايدالانۋ پلاتفورماسى ازىرلەندى، دەپ حابارلايدى ق ر سيفرلىق دامۋ، يننوۆاتسيالار جانە اەروعارىش ونەركاسىبى مينيسترلىگىنىڭ باسپا ءسوز قىزمەتى.

ول گەولوگيالىق اقپاراتقا قول جەتكىزۋدى قامتاماسىز ەتۋگە، ليسەنزيالىق ۋچاسكەلەردى بولۋگە، سونداي- اق جەر قويناۋىن پايدالانۋشىلاردىڭ ەسەپتىلىگى مەن قىزمەتىنىڭ مونيتورينگىن قالىپتاستىرۋعا ارنالعان.

بۇرىن گەولوگيالىق ەسەپتەردى زەرتتەۋدەن باستاپ ليسەنزيا الۋعا جانە جىل سايىنعى ەسەپتەردى ۇسىنۋعا دەيىنگى بارلىق پروتسەستەر قاعاز جۇزىندە جۇرگىزىلگەن ەدى. سونىمەن قاتار، تەكسەرۋ ءۇشىن دەرەكتەردىڭ جەتكىلىكسىزدىگىنە بايلانىستى كوپتەگەن سىبايلاس جەمقورلىق تاۋەكەلدەرى مەن قاتەلىكتەرى ورىن العان بولاتىن. ەندى جەر قويناۋىن پايدالانۋشىلار مەن الەۋەتتى ينۆەستورلارعا ىرگەلەس ينفراقۇرىلىمنان باستاپ، گەولوگيالىق جانە گەوفيزيكالىق ەسەپتەرگە دەيىنگى ەلەكتروندىق فورماتتا سۇرالعان ۋچاسكە تۋرالى تولىق مالىمەت قولجەتىمدى بولادى. پلاتفورمادا قاتتى پايدالى قازبالاردى بارلاۋعا جانە وندىرۋگە وتىنىمدەردى قابىلداۋ، قاراۋ جانە ليتسەنزيا بەرۋ بويىنشا جۇمىستار جۇرگىزىلۋدە. بۇعان قوسا، ونلاين قابىلداۋمەن قاتار، ءتىپتى قاعاز تۇرىندە بەرىلگەن وتىنىمدەر دە تىركەلەتىن بولادى. وسىلايشا، جەر قويناۋى جانە جەر قويناۋىن پايدالانۋ تۋرالى كودەكستە كوزدەلگەن «ءبىرىنشى كەلگەن - ءبىرىنشى الادى» قاعيداتى بويىنشا جەر قويناۋىن پايدالانۋشىنىڭ جەر قويناۋىنا قول جەتكىزۋ قۇقىعىن ساقتاۋدىڭ اشىقتىعى قامتاماسىز ەتىلەدى.

قازىرگى ۋاقىتتا جاڭا فۋنكتسيالاردى ازىرلەۋ جانە 2023 -جىلعى مامىردا جوسپارلانعان ونەركاسىپتىك پايدالانۋعا ەنگىزۋگە دايىندىق بويىنشا جۇمىستار جۇرگىزىلۋدە، جەر قويناۋىن پايدالانۋشىلاردى وقىتۋ جانە پلاتفورما جۇمىسىن كورسەتۋ جۇرگىزىلىپ جاتىر. بۇل رەتتە، ازىرلەۋشىلەر سەرۆيستەردى ودان ءارى دامىتۋدا ەسكەرىلەتىن فۋنكتسيونالدى جاقسارتۋ جانە دامىتۋ جونىندە ۇسىنىستار جيناۋدى جۇزەگە اسىرادى.

پلاتفورمانىڭ اۆتوماتتاندىرىلعان قۇرالدارى تابيعاتتى پايدالانۋ قاقتىعىستارىن بىردەن كورسەتەدى. پايدالانۋشىلاردىڭ زاڭناماعا سايكەس بارلاۋ نەمەسە ءوندىرۋ جۇمىستارىن جۇرگىزۋگە رۇقسات ەتىلگەن نەمەسە تىيىم سالىنعان ۋچاسكەلەردى ءبىر تەرەزە ارقىلى قاراۋعا جانە تاڭداۋعا مۇمكىندىگى بولادى.

پلاتفورماعا 30 مىڭ گەولوگيالىق ەسەپ جۇكتەلگەن. اعىمداعى جىلى كەم دەگەندە 24 مىڭ ەسەپتى زەردەلەۋ كارتاسىن تولىقتىرۋ جوسپارلانىپ جاتىر. جەر قويناۋىن پايدالانۋشىلاردىڭ ليتسەنزيالىق- كەلىسىمشارتتىق تالاپتارىنىڭ ورىندالۋىن مونيتورينگىلەۋ بويىنشا جاڭا فۋنكتسيالار ازىرلەنەتىن بولادى.

ەستەرىڭىزگە سالا كەتەيىك، بۇعان دەيىن بۇل جوبانى مەملەكەت باسشىسىنىڭ تاپسىرماسى بويىنشا ەكولوگيا جانە تابيعي رەسۋرستار مينيسترلىگى جۇزەگە اسىرعان بولاتىن، ءبىراق كەيىن بۇل جۇمىس قازاقستان رەسپۋبليكاسى سيفرلىق دامۋ، يننوۆاتسيالار جانە اەروعارىش ونەركاسىبى مينيسترلىگىنىڭ قاراماعىنا بەرىلدى.

فوتو: ق ر تسيفرلىق دامۋ، يننوۆاتسيالار جانە اەروعارىش ونەركاسىبى مينيسترلىگىنىڭ باسپا ءسوز قىزمەتى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى