ءدارى-دارمەكتى تىركەۋ شارتتارى وڭتايلاندىرىلادى
پرەمەر-مينيستر ءاليحان سمايىلوۆ سەنات دەپۋتاتتارىنىڭ ساۋالىنا جولداعان جاۋابىندا وسىنداي مالىمەت ايتتى.
«دەنساۋلىق ساقتاۋ سالاسىنداعى باسەكەلەستىكتى دامىتۋ جونىندەگى جول كارتاسىنىڭ اياسىندا ءدارى اينالىمىنداعى بۇكىل پروتسەستەردى وڭتايلاندىرىپ، اۆتوماتتاندىرۋ كوزدەلىپ وتىر. بۇل شارالار ءدارى-دارمەكتى قازاقستان اۋماعىندا تىركەۋ شارالارىنان باستاپ تۇتىنۋشىعا جەتكەنگە دەيىنگى شارۋانىڭ ءبارىن قامتيدى»، - دەلىنگەن جاۋاپتا.
قازىرگى تاڭدا ءدارى شىعاراتىن 37 وتاندىق كومپانيا مەملەكەتپەن ۇزاقمەرزىمدى كەلىسىمشارت اياسىندا جۇمىس ىستەپ تۇر.
«بۇگىندە 37 وتاندىق تاۋار وندىرۋشىمەن 4700 دارىلىك زاتتار مەن مەديتسينالىق بۇيىمداردى جەتكىزۋگە باعىتتالعان 101 ۇزاق مەرزىمدى كەلىسىمشارت جاسالعان. ىسىككە قارسى پرەپاراتتار مەن يممۋندىك مودۋلياتورلار، جۇرەك-قان تامىرى جۇيەسىن، جۇيكە جۇيەسىنىڭ اۋرۋلارىن ەمدەۋگە ارنالعان پرەپاراتتار، قابىنۋعا قارسى ستەرويدتى ەمەس پرەپاراتتار جانە دەنساۋلىق ساقتاۋ جۇيەسى تالاپ ەتەتىن باسقا دا پرەپاراتتار ءوندىرىسى جولعا قويىلعان. كەلىسىمشارت ارقىلى ءدارى-دارمەك ءوندىرىسىن دامىتۋعا مۇمكىندىك بەرەتىن وففتەيك- كەلىسىمشارتتار جاساۋ رەجەسىن وڭايلاتۋ باعىتىندا جۇمىس جۇرگىزىلىپ جاتىر»، - دەپ جازادى ءاليحان سمايىلوۆ.
