سەنات بيۋجەت قاراجات كولەمىن وسىرۋگە باعىتتالعان زاڭدى قابىلدادى
«2022-جىلعى 19- ساۋىردە ەۋرازيالىق ەكونوميكالىق وداققا مۇشە مەملەكەتتەردىڭ باسشىلارى تاۋار تاسىمالداۋدى قاداعالاۋ ءۇشىن ناۆيگاتسيالىق پلومبالاردى قولدانۋ تۋرالى كەلىسىمگە قول قويدى. وسى كەلىسىم تاۋارلاردى ناۆيگاتسيالىق پلومبالاردى قولدانا وتىرىپ، ولاردى ەۋرازيالىق ەكونوميكالىق وداقتىڭ اۋماعى بويىنشا وتكىزۋ كەزىندە قاداعالاۋ مۇمكىندىگىن قامتيدى. تاۋارلاردىڭ ساناتتارى مەن كولىك ەرەكشەلىكتەرىنە بايلانىستى وتپەلى كەزەڭدەر قاراستىرىلعان. بۇل قاداعالاۋدىڭ ءاربىر كەزەڭىنىڭ باستالۋىمەن ناۆيگاتسيالىق پلومبالاردى قولدانۋدىڭ تيىمدىلىگىن جەتىلدىرۋگە مۇمكىندىك بەرەدى»، - دەدى ق ر پرەمەر-ءمينيسترىنىڭ ورىنباسارى - قارجى ءمينيسترى ەرۇلان جاماۋبايەۆ.
ونىڭ ايتۋىنشا، بيزنەس ءۇشىن وسى كەلىسىمنىڭ ارتىقشىلىعى - ءوز تاۋارلارىن ە ا ە و كەڭىستىگىندە قاۋىپسىز ترانزيتتەۋ، وعان مۇشە مەملەكەتتەردىڭ باقىلاۋشى ورگاندارى جاعىنان باقىلاۋدىڭ قوسىمشا ءىس-شارالارىن بولدىرماۋ مۇمكىندىگىن جاساۋ.
«كەلىسىم مەملەكەت ءۇشىن حالىقارالىق تاسىمالداردىڭ اشىقتىعىن، «جالعان ترانزيت» پەن «جالعان يمپورتتى» بولدىرماۋعا جانە بيۋجەتكە اقشا تۇسىمدەرىنىڭ ۇلعايۋىنا مۇمكىندىك بەرەدى»، - دەدى مينيستر.
