الماتى - ورتالىق ازياداعى سەيسميكالىق قاۋىپتى ايماقتاردىڭ ءبىرى - مينيستر
بۇل تۋرالى ت ج ءمينيسترى يۋري يلين ۆەدومستۆوارالىق مەملەكەتتىك كوميسسيانىڭ كەزەكتەن تىس وتىرىسىندا ايتتى، دەپ حابارلايدى قازاقپارات.
«سەيسميكالىق قاۋىپسىزدىكتىڭ مەملەكەتتىك جۇيەسىن جەتىلدىرۋ - حالىقتى قورعاۋدىڭ ماڭىزدى باعىتتارىنىڭ ءبىرى جانە مەملەكەت باسشىسىنىڭ ەرەكشە باقىلاۋىندا. الماتى، شىمكەنت قالالارىنىڭ، سونداي-اق اباي، جەتىسۋ، الماتى، شىعىس قازاقستان، جامبىل، قىزىلوردا، تۇركىستان وبلىستارىنىڭ اۋماقتارى سەيسميكالىق قاۋىپسىزدىكتىڭ جوعارى الەۋەتىنە كىرەدى. بۇل رەتتە الماتى قالاسى بۇكىل ورتالىق ازياداعى سەيسميكالىق قاۋىپتى ايماقتاردىڭ بىرىندە ورنالاسقان، - دەدى مينيستر.
سونىمەن قاتار، يۋري يلين ۇكىمەت باسشىسىنىڭ مۇددەلى ورتالىق مەملەكەتتىك جانە جەرگىلىكتى اتقارۋشى ورگانداردىڭ الدىنا سەيسميكالىق قاۋىپسىزدىك جانە قۇرىلىس سالاسىنداعى نورماتيۆتەردىڭ تالاپتارىن ورىنداماعانى ءۇشىن جاۋاپكەرشىلىكتى قاتاڭداتۋ بولىگىندە زاڭناماعا وزگەرىستەر ەنگىزۋ، لاۋازىمدى تۇلعالاردىڭ ولاردى ىسكە اسىرعانى ءۇشىن باقىلاۋى مەن جاۋاپكەرشىلىگىن ارتتىرا وتىرىپ، سەيسميكا بويىنشا جول كارتاسىنىڭ ءىس-شارالارىنا تەكسەرۋ جۇرگىزۋ، جاڭا ءادىسناما بويىنشا وبلىستار مەن ءىرى قالالاردىڭ سەيسميكالىق اۋدانداستىرۋ كارتالارىن ازىرلەۋ جانە، سەيسميكالىق مونيتورينگ جەلىسىن كەڭەيتۋ، جەر سىلكىنىسىن بولجاۋ ادىستەرىن جەتىلدىرۋ جانە بارلىق ەلدى مەكەندەردىڭ سەيسميكالىق قاۋىپ-قاتەرىن باعالاۋدى جۇرگىزۋ مىندەتتەرىن قويدى.
قۇرىلىس كەزىندە سەيسميكالىق قاۋىپسىزدىكتى قامتاماسىز ەتۋ بويىنشا قابىلدانىپ جاتقان شارالار تۋرالى يدم قۇرىلىس جانە تكش ىستەرى كوميتەتى ءتوراعاسىنىڭ ورىنباسارى باقىتجان جۇنىسبەكوۆ ايتىپ بەردى.
وسى ماسەلەنى تىڭداعان كەزدە مينيستر سەيسميكالىق قاۋىپتى وڭىرلەردە قۇرىلىس كەزىندە بارلىق نورمالار مەن ەرەجەلەردى ساقتاۋ قاجەتتىگىنە ەرەكشە نازار اۋداردى، بۇل جەر سىلكىنىسى بولعان جاعدايدا قيراتۋدى بارىنشا ازايتۋعا جانە تيىسىنشە زارداپ شەككەن ازاماتتارعا ىقپال ەتەتىن بولادى. يۋري يلين بەيىندى كوميتەتكە اسىرەسە جەكە سەكتورداعى قۇرىلىس پەن نورمالاردىڭ ساقتالۋىنا نازار اۋدارۋدى ۇسىندى.
سەيسميكالىق قاۋىپتى وڭىرلەردەگى وبەكتىلەردى ەسەپكە الۋ جانە پاسپورتتاۋ، وسى باعىتتاعى باقىلاۋ بويىنشا جۇرگىزىلىپ جاتقان جۇمىستار تۋرالى اقپاراتتى ءبىرقاتار باسقا وڭىرلەردىڭ بەيىندى ۇيىمدارى مەن مينيسترلىكتەردىڭ وكىلدەرى جەتكىزدى.
سونىمەن قاتار، ەلىمىزدەگى اعىمداعى سەيسميكالىق جاعداي تۋرالى «سەيسمولوگيا ينستيتۋتى» ج ش س ديرەكتورى داۋلەت سارسەنبايەۆ، سونداي-اق قازاقستاندىق قۇتقارۋشىلاردىڭ تۇركياداعى جويقىن جەر سىلكىنىسىنىڭ سالدارىن جويۋعا قاتىسۋ تاجىريبەسى تۋرالى ت ج جويۋ دەپارتامەنتىنىڭ باستىعى كاحارمان ورازالين باياندادى.
قارجى مينيسترلىگى قۇقىق قورعاۋ، ارنايى ورگاندار جانە قورعانىس بيۋدجەتى دەپارتامەنتى ديرەكتورىنىڭ ورىنباسارى دۇيسەن ءادىلحانوۆ ەلىمىزدىڭ سەيسميكالىق قاۋىپسىزدىگىن قامتاماسىز ەتۋگە بولىنەتىن بيۋدجەتتىك قۇرالدار تۋرالى ايتتى.
وتىرىس قورىتىندىسى بويىنشا ورتالىق مەملەكەتتىك جانە جەرگىلىكتى اتقارۋشى ورگاندار ءۇشىن ءبىرقاتار ۇسىنىمدار ازىرلەندى.
