ۇلىتاۋ وبلىسىنىڭ كەيبىر بولىگى ەكولوگيالىق اپات ايماعى رەتىندە بەلگىلەنبەك
«مەسسەندجەرلەردە جالاقىعا ۇستەمەاقى جانە قوسىمشا دەمالىس بەرىلەتىنى تۋرالى اۋديو حابارلاما تاراپ جاتىر. وسى ورايدا ۇلىتاۋ وبلىسى اكىمدىگىنىڭ 2022-جىلعى 21- قازانداعى 28/02№ قاۋلىسىمەن اۋماقتى (اكۆاتوريانى) زەرتتەۋ جونىندەگى كوميسسيا قۇرىلعانىن ەسكەرتەمىز. بۇل رەتتە، ءوڭىردىڭ كەيبىر بولىگىن ەكولوگيالىق اپات ايماعى دەپ جاريالاۋ ەسكەرىلگەن. كوميسسيا مۇشەلەرى ايماقتى تولىق زەرتتەۋ كەرەك ەكەنى جايىندا بىرنەشە وتىرىس ۇيىمداستىردى. ناتيجەسىندە عىلىمي-زەرتتەۋ ينستيتۋتتارىن جۇمىسقا تارتۋ تۋرالى شەشىم قابىلداندى»، - دەلىنگەن ۇلىتاۋ وبلىسى اكىمدىگىنىڭ Telegram كانالىندا.
قازىرگى كەزدە مەملەكەتتىك ساتىپ الۋ پورتالىندا ءتيىستى زەرتتەۋلەرگە كونكۋرس جاريالاندى. بۇل باعىتتاعى جۇمىس 1,5-2 جىلعا سوزىلادى. زەرتتەۋ جۇرگىزىلىپ، ساراپشىلاردىڭ قورىتىندىسى شىقاننان كەيىن، ناتيجەلەر ق ر ەكولوگيا، گەولوگيا جانە تابيعي رەسۋرستار مينيسترلىگىنىڭ، ق ر دەنساۋلىق ساقتاۋ مينيسترلىگىنىڭ جانە ق ر ەڭبەك جانە حالىقتى الەۋمەتتىك قورعاۋ مينيسترلىگىنىڭ قاراۋىنا جىبەرىلەدى.
«اتالعان مينيسترلىكتەردىڭ رۇقساتىمەن جانە ق ر ۇكىمەتىنىڭ قاۋلىسى نەگىزىندە جەزقازعان قالاسى، ساتبايەۆ جانە ۇلىتاۋ وبلىسىنىڭ ۇلىتاۋ اۋدانىنىڭ ءبىر بولىگى ەكولوگيالىق اپات ايماعى بولىپ جاريالانۋى مۇمكىن. سودان كەيىن عانا ءتيىستى تولەمدەر جانە الەۋمەتتىك جەڭىلدىكتەر قاراستىرىلادى»، - دەپ اتالىپ وتكەن اكىمدىك حابارلاماسىندا.
بۇدان بۇرىن حابارلانعانداي، بىلتىر ايماق باسشىسى بەرىك ءادىعالي ۇلى قازاقپارات تىلشىسىنە بەرگەن سۇحباتىندا ۇلىتاۋ وڭىرىندە ءبىرىنشى كەزەكتە قولعا الىناتىن نەگىزگى شارۋالاردى اتادى. وسى ورايدا ۇلىتاۋ وبلىسىنىڭ تۇرعىندارىنا ەكولوگيالىق وتەماقى تولەۋ ماسەلەسى زەرتتەلەدى.
