اسكەري بيلەتتى ونلاين الۋعا بولادى
بۇل تۋرالى سيفرلىق دامۋ، يننوۆاتسيالار جانە اەروعارىش ونەركاسىبى ءمينيسترى باعدات مۋسين جەلىدەگى پاراقشاسىندا جازدى، دەپ حابارلايدى قازاقپارات.
«بىرنەشە اي بۇرىن ەلوردالىق اسكەري كوميسسارياتتاردىڭ بىرىنە بارىپ، قورعانىس مينيسترلىگىنىڭ وكىلدەرىمەن بىرگە وسى سالانى سيفرلاندىرۋ جوسپارلارىن تالقىلاعان بولاتىنبىز. سوندا كوتەرىلگەن ماسەلەلەردىڭ ءبىرى - اسكەرگە شاقىرىلاتىن جاستاردى اسكەري قىزمەتكە شاقىرۋدان بوساتۋ نەمەسە كەيىنگە قالدىرۋ ماقساتىندا تالاپ ەتىلەتىن انىقتامالاردان ارىلتۋ بولاتىن. ول ءۇشىن بىرنەشە جۇيەنى بىرىكتىرۋ قاجەت ەدى.
اراعا ۋاقىت سالىپ، بىرلەسكەن جۇمىستىڭ ارقاسىندا ناتيجەگە قول جەتكىزدىك. ماسەلەن، وسى جىلدىڭ 1-ناۋرىزىنان باستاپ ازاماتتار تولىپ جاتقان انىقتامالار مەن قۇجاتتاردى ۇسىنباي، اسكەري قىزمەتتى وتكەرۋ تۋرالى ءوز مارتەبەسىن ءبىر جۇيەدەن بىلە الادى»، - دەپ جازدى مينيستر.
«ۇلتتىق اقپاراتتىق تەحنولوگيالار» ا ق جانە قورعانىس مينيسترلىگىمەن بىرلەسىپ، قازاقستاندىقتاردى اسكەرگە شاقىرۋدان بوساتۋ جانە كەيىنگە قالدىرۋ تۋرالى اقپارات بەرەتىن پرواكتيۆتى مەملەكەتتىك قىزمەتتى ىسكە قوستى.
«اسكەرگە بارۋعا مىندەتتى ەر ادامدارعا، ياعني 18-27 جاستاعى ازاماتتارعا اسكەردەن بوساتۋ نەمەسە كەيىنگە قالدىرۋ بويىنشا ءتيىستى اقپارات تەلەفوندارىنا حابارلاما رەتىندە جولداناتىن بولادى. موبيلدى ازاماتتار بازاسىندا تىركەلگەن قازاقستاندىقتار عانا حابارلاما الاتىنىن اتاپ وتەمىن. قازىرگى كۇنى جارتى ميلليون اسكەرگە شاقىرىلۋشى 1414 تەن ЅMЅ حابارلامالار الىپ ۇلگەردى»، - دەپ تولىقتىردى ب. مۋسين.
