اتىراۋدا بالالار اۋىلىنىڭ ديرەكتورى جۇمىسىنان شەتتەتىلدى
اتىراۋ وبلىستىق ءبىلىم باسقارماسى باسشىسىنىڭ بۇيرىعىمەن وتباسىلىق ۇلگىدەگى «شاڭىراق» بالالار اۋىلىنىڭ ديرەكتورى گۇلسارا بوتاتايەۆا اتقاراتىن قىزمەتىنەن تەرگەۋ جۇرگىزۋ كەزىندە ۋاقىتشا شەتتەتىلگەن.
«بالالار ءۇيى تاربيەلەنۋشىلەرىنىڭ وتىنىشىنەن كەيىن ق ر قىلمىستىق كودەكسىنىڭ 140-بابىمەن («كامەلەتكە تولماعان بالانى تاربيەلەۋ جونىندەگى مىندەتتەردى ورىنداماۋ» ) بويىنشا سوتقا دەيىنگى تەرگەۋ باستالدى. تەرگەۋ اياقتالىپ، وقيعانىڭ بارلىق ءمان- جايى انىقتالعاننان كەيىن ديرەكتوردىڭ جۇمىسىن جالعاستىرۋ تۋرالى شەشىم قابىلدانادى»، - دەپ حابارلادى باسقارمانىڭ باسپا ءسوز قىزمەتى.
«بالالاردىڭ قۇقىعىن شەكتەۋ دەگەن ماسەلە تۋىنداماۋى كەرەك. ءبىز بۇل ماسەلەگە ەرەكشە نازار اۋدارىپ وتىرمىز. قازىر وبلىستىق ءبىلىم باسقارماسى جانىنان ارنايى كوميسسيا قۇرىلدى. كوميسسيا قۇرامىنداعى پسيحولوگتار ءار بالامەن جەكە اڭگىمەلەسىپ، تەكسەرۋ جۇرگىزىپ جاتىر. بالالاردىڭ پسيحولوگيالىق جاعدايىنا باعا بەرىلەدى. پەداگوگيكالىق قۇرامنىڭ تاربيە جۇمىسىنا ساراپتاما جاسالادى. ارنايى كوميسسيانىڭ تەكسەرۋ قورىتىندىسى تۋرالى كەيىن حابارلايمىز»، - دەپ ءمالىم ەتتى جاسۇلان بيسەمبيەۆ.
ەسكە سالا كەتەلىك، بۇعان دەيىن اتىراۋدا بالالار ۇيىندەگى ۇرىپ- سوعۋ دەرەگىن ارنايى كوميسسيا تەكسەرىپ جاتقانىن حابارلاعان ەدىك.
