كانادا مەملەكەتتىك قىزمەتشىلەرگە تيكتوكتى پايدالانۋعا تىيىم سالدى
كانادا بيلىگى مۇنداي شەشىم شىعارۋىن اتالعان الەۋمەتتىك جەلىنىڭ مەملەكەتتىك قىزمەتكەرلەر گادجەتتەرىنىڭ قۇپيالىلىعى مەن قاۋىپسىزدىگىن قورعاۋ دەڭگەيىنىڭ تومەندىگىمەن بايلانىستىرىپ وتىر.
كەيبىر امەريكالىق جانە ەۋروپالىق زاڭ شىعارۋشىلار مەن شەنەۋنىكتەر بەيجىڭ TikTok-تى ءوز پايدالانۋشىلارى تۋرالى دەرەكتەر بەرۋگە ماجبۇرلەۋى نەمەسە ادامدار كورىپ وتىرعان بەينەلەرگە اسەر ەتۋى مۇمكىن دەپ الاڭداۋشىلىق بىلدىرۋدە. وتكەن اپتادا ەۋروپالىق كوميسسيا ءوز قىزمەتكەرلەرىنە Tik Tok-تى جۇمىس قۇرىلعىلارىندا پايدالانۋعا تىيىم سالدى. ەۋروپا ءوز ديرەكتيۆاسىن شىعارعان كەزدە، كانادالىق رەتتەۋشى ورگاندار پلاتفورمانىڭ قۇپيالىلىقتى ساقتاۋىنا قاتىستى تەرگەۋدى باستادى.
ا ق ش- تا فەدەرالدى ۇكىمەت پەن كوپتەگەن شتاتتار مەملەكەتتىك قىزمەتكەرلەرگە TikTok-تى قۇرىلعىلارىنا ورناتۋعا تىيىم سالدى.
كانادانىڭ مەملەكەتتىك قىزمەت ءمينيسترى مونا فورتەنىڭ ايتۋىنشا، رەسمي تۇلعالار تەكسەرۋدەن كەيىن TikTok قوسىمشاسىنىڭ «قۇپيالىلىق پەن قاۋىپسىزدىك ءۇشىن قولايسىز قاۋىپتىلىك دەڭگەيىن بىلدىرەتىنىن» انىقتادى.
جاقىندا تورونتو ماڭىنداعى ءىس- شارادا كانادا پرەمەر- ءمينيسترى دجاستين تريۋدو ۇكىمەتتىڭ TikTok تۋرالى شەشىمى كاسىپكەرلەر مەن جەكە تۇلعالاردى «ءوز دەرەكتەرىنىڭ قاۋىپسىزدىگى تۋرالى ويلانۋعا جانە تاڭداۋ جاساۋعا» يتەرمەلەۋى مۇمكىن دەپ مالىمدەدى.
Apptopia اناليتيكالىق كومپانياسىنىڭ مالىمەتتەرى بويىنشا، 2022 -جىلدىڭ ناتيجەسىنە سايكەس Tik Tok الەمدەگى جانە ا ق ش- تاعى ەڭ كوپ جۇكتەلگەن قوسىمشاعا اينالدى.
