مەكسيكادا مىڭداعان ادام سايلاۋ رەفورماسىنا قارسى شىقتى

ەڭ ۇلكەن نارازىلىق شاراسى مەحيكو قالاسىندا ءوتتى. ۇيىمداستىرۋشىلاردىڭ ايتۋىنشا، 500 مىڭ ادام شەرۋ قۇرىپ، قالانىڭ باس الاڭىنان ءجۇرىپ وتكەن. الايدا، جەرگىلىكتى ۇكىمەت نارازىلىق شاراسىنا 90 مىڭ ادام شىقتى دەپ مالىمدەدى.

مەكسيكانىڭ پارلامەنت مۇشەلەرى وتكەن اپتادا پرەزيدەنت اندرەس مانۋەل لوپەس باستاعان رەفورمانى قولداپ، داۋىس بەردى. بۇل رەفورما ۇلتتىق سايلاۋ ينستيتۋتىنىڭ بيۋجەتى مەن شتاتىن قىسقارتۋدى كوزدەيدى.

ءبىراق، رەفورماعا قارسى شىققاندار بۇل دەموكراتياعا نۇقسان كەلتىرەدى جانە ەل كونستيتۋتسياسىنا قايشى دەپ ساناپ، جوعارعى سوتتان ونىڭ قابىلدانباۋىن تالاپ ەتەدى.

جەكسەنبى كۇنى مەحيكونىڭ سوكالو الاڭىنا حالىق كوپ جينالدى. شەرۋشىلەر قالا ورتالىعىنداعى كوشەلەرگە دە شىقتى.

مەكسيكانىڭ باسقا دا بىرنەشە قالاسىندا شاعىنداۋ جانە بەيبىت شەرۋلەر ءوتتى.

مەكسيكا سەناتى سارسەنبى كۇنى ەل پارلامەنتىنىڭ تومەنگى پالاتاسى داۋىس بەرگەننەن كەيىن رەفورمانى ماقۇلدادى. رەفورما پرەزيدەنت زاڭعا قول قويعاننان كەيىن كۇشىنە ەنەدى.

ەكى رەت داۋىس جيناي الماي، 2018-جىلى شىلدەدە سايلانعان ەلدىڭ قازىرگى پرەزيدەنتى اندرەس مانۋەل لوپەس ۇزاق ۋاقىت بويى ۇلتتىق سايلاۋ ينستيتۋتىن سىناپ كەلدى. وتكەن ايدا ول تاۋەلسىز ۇيىمعا الاياقتىق جاسادى دەگەن ايىپ تاقتى. ونىڭ قىزمەتكەرلەرى «سايلاۋ جاشىكتەرىن تولتىرۋ، (سايلاۋ) حاتتامالارىن بۇرمالاۋ جانە داۋىستاردى ساتىپ الۋ ارەكەتتەرىنە» كوز جۇمىپ وتىرعانىن ايتتى.

ءبىرىنشى رەت سايلاۋعا تۇسكەنىندە، ياعني 2006-جىلى اندرەس مانۋەل لوپەس قارسىلاسى فەليپە كالدەروننان از عانا باسىمدىقپەن جەڭىلىپ قالعان. ول الاياقتىق جاسالدى دەپ، سايلاۋ ناتيجەسىن ايلار بويى مويىنداۋدان باس تارتتى.

سونداي-اق، ەكىنشى رەت، ياعني 2012-جىلعى سايلاۋدا ەنريكە پەنيا نەتودان جەڭىلگەن كەزدە دە داۋلاسقان.

2018-جىلعى جەڭىسىنەن بەرى لوپەس ينستيتۋتتى رەفورمالاۋدى تالاپ ەتىپ كەلەدى. ونىڭ ايتۋىنشا، اگەنتتىك شتاتىن كۇرت قىسقارتۋ ارقىلى سالىق تولەۋشىلەر جىلىنا 150 ميلليون دوللار ۇنەمدەيدى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى