شەتەلدىكتەردىڭ ەلدە زاڭسىز جۇمىس ىستەۋىنە قازاقستاندىقتار كومەكتەسىپ وتىر – ءى ءى م
«شەتەلدىكتەر جاساعان قۇقىق بۇزۋشىلىقتاردى تالداۋ ولاردىڭ ەلگە زاڭدى تۇردە كىرەتىنىن كورسەتەدى. الايدا، كەيبىر جاعدايلاردا ولار كوشى- قون زاڭناماسىن بۇزۋشىلار قاتارىنان تابىلدى جانە وعان قازاقستان ازاماتتارى كومەكتەسەدى. بۇزۋشىلىقتاردىڭ ەداۋىر بولىگى شەتەلدىكتەردى رۇقسات قۇجاتتارىن الماي جۇمىسقا تارتۋمەن بايلانىستى. مىسالى، الماتى، اتىراۋ قالالارىنىڭ قۇرىلىس نىساندارىندا زاڭسىز ەڭبەك ەتكەن 95 شەتەلدىك انىقتالدى. قۇرىلىس نىساندارىندا شەتەلدىكتەردىڭ ەڭبەگى زاڭسىز پايدالانۋ فاكتىسى استانا، شىمكەنت قالالارىندا، تۇركىستان جانە شىعىس قازاقستان وبلىستارىندا دا اشكەرەلەندى»، - دەدى شۇعىلا تۇرلىبەك مينيسترلىكتىڭ باسپا ءسوز قىزمەتى الاڭىندا وتكەن بريفينگتە.
ونىڭ اتاپ وتۋىنشە، ەڭبەك قىزمەتىن زاڭسىز جۇزەگە اسىرعان شەتەلدىكتەر مەن ولاردىڭ جۇمىس بەرۋشىلەرى جاۋاپقا تارتىلعان.
«سونداي-اق اتىراۋ وبلىسىندا شەتەلدىك جۇمىس كۇشىن بىرنەشە رەت زاڭسىز تارتقان جۇمىس بەرۋشى انىقتالدى. وعان قاتىستى ق ر ق ك 395-بابىندا كوزدەلگەن قىلمىس بەلگىلەرى بويىنشا سوتقا دەيىنگى تەرگەۋ باستالدى. مۇنان بولەك، زاڭدى تۇلعالاردىڭ شەتەلدىكتەردى ەلگە تۇسىنىكسىز ماقساتتا شاقىراتىنى جانە بولاشاقتا ولاردىڭ ۋاقتىلى ەلدەن كەتۋى بويىنشا ءىس-شارا قابىلدامايتىنى بايقالادى. ماسەلەن، باتىس قازاقستان وبلىسىندا نيگەريانىڭ 2 ازاماتى جانە تۇركيانىڭ 7 ازاماتى انىقتالدى. ولار ەلدە بولۋ مەرزىمدەرىن بۇزعان. قۇقىق بۇزۋشىلىق ماتەريالدارى شەشىم قابىلداۋ ءۇشىن سوتقا جىبەرىلدى»، - دەدى مينيسترلىك وكىلى.
