الماتى- قورعاس تاسجولىندا جەڭىل اۆتوكولىك تيەگەن جۇك كولىكتەرى سوقتىعىستى - ۆيدەو
الەۋمەتتىك جەلىدە «الماتى- قورعاس» تاسجولىندا بولعان ءىرى جول اپاتىنىڭ ۆيدەوسى پايدا بولدى.
بەينەجازبادان اۋدارىلىپ قالعان جۇك تيەلگەن تىركەمە مەن قيراعان كولىكتەردى بايقاۋعا بولادى.
الماتى وبلىستىق پوليتسيا دەپارتامەنتى ءمالىم ەتكەندەي، جول اپاتى 26-اقپان كۇنى ساعات 11:00-دە الماتى- شەلەك- قورعاس تاسجولىنىڭ 42-شاقىرىمىندا بولدى.
الدىن الا مالىمەت بويىنشا، 40 جاستاعى جۇرگىزۋشى تىزگىندەگەن MAN جۇك كولىگىنىڭ ارتقى جارتىلاي تىركەمەسى شىعىپ كەتىپ، DAF اۆتوتاسىعىشىنا سوعىلىپ، سوققى ينەرتسياسىنان ول Mercedes-Benz اۆتوتاسىمالداۋشىسىمەن سوقتىعىسقان.
MAN جۇك كولىگى بۇيىرىنە اۋدارىلىپ قالعان. اپات سالدارىنان اۆتوكولىك تاسىمالداۋشى جۇك كولىگىنە تيەلگەن كولىكتەر زاقىمدالعان. قۇرباندار مەن زارداپ شەككەندەر جوق.
پوليتسەيلەر جول- كولىك وقيعاسى بويىنشا قر اقبتك- ءنىڭ 610-بابىنىڭ 2-بولىگى «ادامداردىڭ دەنساۋلىعىنا، كولىك قۇرالدارىنىڭ نەمەسە وزگە دە مۇلىكتىڭ زاقىمدالۋىنا اكەپ سوققان جول قوزعالىسى ەرەجەلەرىن بۇزۋ» بويىنشا تەرگەۋ جۇرگىزىپ جاتىر.
