يگور سون وليمپيادا جۇلدەگەرىنە بەرىلگەن اقشالاي سىيلىق پەن پاتەردەن ايىرىلا ما

«2020 -جىلى توكيو وليمپياداسىندا الىنعان يگور سوننىڭ دوپينگ سىناماسى تازا بولعاندىقتان، وليمپيادانىڭ قولا مەدالى، سونداي-اق وعان بەرىلگەن اقشالاي سىيلىق پەن پاتەر الىنبايدى»، - دەپ اتاپ ءوتتى مادەنيەت جانە سپورت مينيسترلىگىنىڭ باسپا ءسوز قىزمەتىنەن.

ۆەدومستۆونىڭ مالىمەتىنشە، WADA حالىقارالىق ەرەجەلەرىنە سايكەس، جوعارى ناتيجە كورسەتكەن كاسىبي سپورتشىلار، وليمپيادا چەمپيوندارى مەن جۇلدەگەرلەر جۇيەلى تۇردە دوپينگ سىناعىنان وتەدى.

وسىعان بايلانىستى 2022 -جىلعى 2-ناۋرىزدا جەتىسۋ وبلىسىنداعى تۋرنيردە يگور سوننان دوپينگ- سىناما الىنىپ، ول وڭ ناتيجە بەردى.

«WADA ستاندارتتارىنا سايكەس سىناما بىرنەشە رەت تەكسەرىلدى. ناتيجەسىندە، WADA ەرەجەسى بويىنشا سپورتشىنى 8 جىلعا ديسكۆاليفيكاتسيالاۋ تۋرالى شەشىم قابىلداندى. ول 2022 -جىلدىڭ 8-ناۋرىزىنان 2030 -جىلدىڭ 28-ناۋرىزىنا دەيىن سوزىلادى»، - دەپ ناقتىلايدى مينيسترلىك.

ەسكە سالا كەتەيىك، وليمپيادا جۇلدەگەرى يگور سون دوپينگ قولدانعانى ءۇشىن 8 جىلعا سپورتتان شەتتەتىلگەن بولاتىن.

فوتو: sports.kz

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى