قايتارىمسىز گرانت ۇتىپ العان اتىراۋلىق جىگىت ءوز اۋىلىنان كينوزال اشتى

ماحامبەت اۋدانىندا تۇراتىن جاس كاسىپكەر الىبەك جۇماعاليەۆ ءوزى تۇراتىن اۋىلىندا شاعىن كينوزال اشتى. ول وسى جوباسى ءۇشىن جاڭا بيزنەس- يدەيالاردى ىسكە اسىرۋعا بەرىلەتىن 1 ميلليون 225 مىڭ تەڭگەنىڭ قايتارىمسىز گرانتىنا يە بولعان.

«اۋدان ورتالىعى - ماحامبەت اۋىلىندا تۇرامىن. وسىنداعى «بيزنەس- ينكۋباتور» عيماراتىنان اشقان جاڭا كينوزالعا ءار بۋىننىڭ وكىلدەرى كەلەدى. كۇندىز بالالارعا ارنالعان قىزىقتى مۋلتفيلمدەر قويامىز. كەشكە ەرەسەكتەر، وتباسىمەن، دوستارىمەن جينالىپ، ءتۇرلى فيلمدى كورەدى. بيلەت باعاسى بالالار ءۇشىن 800 تەڭگە، ەرەسەكتەرگە 1200 تەڭگە. ازىرگە زالدىڭ شارشى مەترى 10 ادامعا عانا ارنالعان»، - دەيدى الىبەك جۇماعاليەۆ.

ونىڭ ايتۋىنشا، كينوزالعا كەلۋشىلەردىڭ باسىم بولىگى - وقۋشىلار مەن جاسوسپىرىمدەر. ءار اپتانىڭ سارسەنبىسىندە الەۋمەتتىك جاعدايى تومەن وتباسىلاردىڭ بالالارىنا كينو تەگىن كورسەتىلەدى.

«قايتارىمسىز گرانت قارجىسىنا قاجەتتى قۇرىلعىلاردى، LED ەكراندى ساتىپ الدىم. كەيىن زالدى دايىنداپ، جوندەۋ جۇرگىزدىك. ازىرگە ارنايى فورماتتاعى فيلمدەردى عالامتوردان الىپ وتىرمىز. پروكاتقا بىردەن مۇمكىندىك بولمادى. كەلۋشىلەر سانى كوبەيسە، زالدى كەڭەيتۋدى ويلاستىرىپ ءجۇرمىن. جاڭا فيلمدەردى كورسەتكىمىز كەلەدى»، - دەيدى جاس كاسىپكەر.

ماحامبەت اۋداندىق اكىمدىگىنىڭ مالىمەتىنشە، بىلتىر جاڭاشىل بيزنەس-يدەيالاردى ىسكە اسىرۋعا بەرىلەتىن قايتارىمسىز گرانتتى 30 ادام ۇتقان. ونىڭ 15 ى جاستار بولسا، قالعانى الەۋمەتتىك وسال توپ ساناتىنداعى جاندار.

ەسكە سالا كەتەلىك، بۇعان دەيىن اتىراۋ وبلىسىنىڭ كاسىپكەرلەرىنە 1,9 ميلليارد تەڭگەنىڭ سۋبسيدياسى بەرىلەتىنىن جازعان بولاتىنبىز.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى