كولىك الۋعا جەڭىلدەتىلگەن نەسيە بەرۋ باعدارلاماسىنا قوسىمشا قاراجات بولىنبەيدى
بۇل تۋرالى سەناتتاعى پارلامەنتتىك تىڭداۋدان كەيىن تىلشىلەرگە پرەمەر- ءمينيستردىڭ ءبىرىنشى ورىنباسارى رومان سكليار ايتتى، دەپ حابارلايدى قازاقپارات ءتىلشىسى.
«كولىك الۋعا جەڭىلدەتىلگەن نەسيە بەرۋ باعدارلاماسىنا توقتالساق، 188 ميلليارد تەڭگە ريەۆولۆەرلىك نەگىزدە وسى جۇيە بويىنشا يگەرىلىپ جاتىر. اتاپ ايتقاندا، ەلىمىزدە بۇل باعدارلاماعا ايتارلىقتاي سۇرانىس بار. ازىرگە، سالىنعان 188 ميلليارد تەڭگە جەتكىلىكتى دەپ سانايمىز. جاقىن ارادا اينالىمداعى وسى قاراجاتقا قوسىمشا اقشا بولىنبەيدى. سەبەبى ەلىمىزدە جۇزەگە اسىراتىن باسقا دا ماڭىزدى مىندەتتەر بار»، - دەدى ر. سكليار.
سونىمەن قاتار ول اتالعان باعدارلاما اياسىندا قاراجات اينالىمدا قالاتىنىن ايتتى.
«باعدارلاما تۇراقتى نەگىزدە ىسكە اسىرىلادى. ءبىراق ونىڭ اياسىندا بەرىلەتىن نەسيە سانىنا قاتىستى ءۋاج ايتىلىپ جاتقانى بەلگىلى. الداعى ۋاقىتتا دا ريەۆولۆەرلىك نەگىزدە قارجىلاندىرۋ جالعاسادى، ياعني وسى اينالىمداعى قاراجاتى باسقا ماقساتتارعا جۇمسامايمىز»، - دەدى ۇكىمەت باسشىسىنىڭ ءبىرىنشى ورىنباسارى.
