قازاقستاننىڭ مەملەكەتتىك شەكاراسى بويىندا داۋلى ۋچاسكەلەر جوق - ەرلان الداجۇمانوۆ

«قازىرگى ۋاقىتتا بىزدە مەملەكەتتىك شەكاراسى بويىندا داۋلى ۋچاسكەلەر جوق. ءبىز قىتايمەن، قىرعىزستانمەن اراداعى شەكارا ماسەلەسىن تولىعىمەن شەشتىك. بىزدە تۇركىمەنستانمەن ارادا تەك راتيفيكاتسيا ماسەلەسى عانا قالدى، ياعني بارلىق ءىس- شارالار اتقارىلدى دەسەك بولادى. رەسەيگە قاتىستى توقتالساق، شىعىس قازاقستان وبلىسىنداعى شەكارالاس تاۋلى جەرلەر ءتيىستى جۇمىستاردى (شەگەندەۋ) جۇرگىزۋ قيىنداۋ بولىپ تۇر. از ۋاقىتتا بۇل ماسەلەنى تولىقتاي شەشۋگە بولادى. قازىر جوسپارعا سايكەس جۇمىستار جالعاسىپ جاتىر جانە ونى ۋاقىتىلى اياقتايمىز دەگەن ويدامىن. بۇل تۇرعىدا داۋلى ماسەلەلەر جوق دەپ ايتۋعا بولادى»، - دەدى ە. الداجۇمانوۆ سەناتتىڭ جالپى وتىرىسىنان كەيىن تىلشىلەر سۇراعىنا جاۋاپ بەرە وتىرىپ.

وسى ورايدا ول قازاقستان مەن رەسەيدىڭ شەكاراسى 7,5 مىڭ شاقىرىمنان استام ەكەنىن ەسكە سالدى.

«بۇل رەتتە تاۋلى ايماقتاعى از عانا جەر قالدى. شەكارا دەماركاتسياسى بويىنشا جۇمىستىڭ ەكى كەزەڭى قاراستىرىلعان. ءبىرىنشى كەزەڭى تەوريالىق، ياعني شەكارانىڭ قاعاز جۇزىندەگى سيپاتتاماسى جاسالادى. ال ەكىنشى كەزەڭدە مەملەكەتتىك شەكاراعا بارىپ، ناقتى نۇكتەلەر بەلگىلەنەدى. اتالعان ۋچاسكەلەردە كليمات جاعدايىن ەسكەرە وتىرىپ، ءتيىستى جۇمىستار بىرتىندەپ جالعاسىپ كەلەدى. بىلتىر ءبىراز جەردى قامتىدىق. شامامەن رەسەمەن ارادا 300 شاقىرىم جەردە ءتيىستى بەلگىلەر قويىپ شىعۋ كەرەك»، - دەدى شەكارا قىزمەتىنىڭ ديرەكتورى.

بۇدان بۇرىن حابارلانعانداي، بىلتىر كۇزدە ق ر پرەمەر- ءمينيسترىنىڭ ورىنباسارى - سىرتقى ىستەر ءمينيسترى مۇحتار تىلەۋبەردى رەسەيمەن اراداعى شەكارانى تولىق دەماركاتسيالاۋعا 2-3 جىل ۋاقىت كەرەك ەكەنىن ايتقان ەدى.

اۆتور

رۋسلان عابباسوۆ

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى