ءبىرتانوۆ پەن ابىشەۆ ءىسى: اپەللياتسيالىق سوت ۇكىم شىعاردى

«ق ر قىلمىستىق ءىس جۇرگىزۋ كودەكسىنىڭ 431-بابى، 443-بابى، 444-بابى 1-بولىگىنىڭ 1-تارماعىن باسشىلىققا الا وتىرىپ، سوت القاسى قاۋلى ەتتى: استانا قالاسى سارىارقا اۋدانىنىڭ 2022-جىلعى 28- قازانداعى 2№ اۋداندىق سوتىنىڭ ەلجان ءبىرتانوۆقا، ولجاس ابىشەۆكە قاتىستى ۇكىمى وزگەرىسسىز قالدىرىلسىن. قورعاۋشىلار مەن سوتتالعانداردىڭ اپەللياتسيالىق شاعىمدارى قاناعاتتاندىرىلمايدى. قاۋلى جاريا ەتىلگەن ساتتەن باستاپ زاڭدى كۇشىنە ەنەدى»، - دەدى اپەللياتسيالىق سوت القاسىنىڭ ءتوراعاسى ايبەك امىرعاليەۆ.

ايتا كەتەيىك، بىلتىر 28- قازاندا ەلجان ءبىرتانوۆ پەن ولجاس ابىشەۆكە قاتىستى سوت ۇكىمى شىققان ەدى. وعان ساي، ەكس-مينيسترگە 5 جىل باس بوستاندىعىن شەكتەۋ، ال و. ابىشەۆكە 4 جىل باس بوستاندىعىن شەكتەۋ تۇرىندەگى جازا تاعايىندالعان. سونىمەن قاتار، سوت دەنساۋلىق ساقتاۋ مينيسترلىگىنىڭ ازاماتتىق تالابىن ءىشىنارا قاناعاتتاندىردى. ياعني، ە. ءبىرتانوۆ پەن و. ابىشەۆتەن دەنساۋلىق ساقتاۋ مينيسترلىگىنىڭ پايداسىنا 1 ميلليارد 350 ميلليون 123 مىڭ 129 تەڭگە كولەمىندە ماتەريالدىق شىعىن وتەۋى ءتيىس. ول ءۇشىن 3 اي ۋاقىت بەرىلگەن. ەگەر وسى ارالىقتا قاجەتتى سوما تولەنبەسە، وندا تالاپ ماجبۇرلەپ ورىنداۋعا جاتادى.

ەسكە سالايىق، بۇرىنعى دەنساۋلىق ساقتاۋ ءمينيسترى ەلجان ءبىرتانوۆ 2020-جىلدىڭ 3- قاراشاسىندا بيۋجەت قاراجاتىن ىسىراپ ەتتى دەگەن كۇدىكپەن قاماۋعا الىنعان بولاتىن. تەرگەۋ ماتەريالى بويىنشا، ەكس-مينيستر مەن ونىڭ ورىنباسارى ولجاس ابىشەۆكە «ericsson Nicola Tesla» كومپانياسىنىڭ قىزمەتىن قولدانۋ كەزىندە «لاۋازىمدىق وكىلەتىن تەرىس پايدالانۋ» ارقىلى مەملەكەتكە 1,5 ميلليارد تەڭگە شىعىن كەلتىردى دەگەن ايىپ تاعىلعان.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى