ءۇندىستان تۇركياعا قۇتقارۋشىلار مەن ءدارى-دارمەك جىبەردى
دۇيسەنبى تاڭىندا تۇركيانىڭ وڭتۇستىك-شىعىسىندا جانە سيريانىڭ سولتۇستىگىندە 7,8, 7,6 جانە 6 بالدىق جەر سىلكىنىسى بولىپ، ايماقتا 4300 دەن استام ادام قازا تاپتى.
ءۇندىستاننىڭ پرەمەر-ءمينيسترى نارەندرا مودي دۇيسەنبى كۇنى ەل بيلىگىنە جەر سىلكىنىسىنىڭ سالدارىن ەڭسەرۋ ءۇشىن قولدان كەلگەن كومەكتى كورسەتۋدى تاپسىردى.
«گۋمانيتارلىق كومەكتىڭ ءبىرىنشى پارتياسى - ىزدەۋ-قۇتقارۋ توپتارى، ارنايى ۇيرەتىلگەن يتتەر، ءدارى-دارمەك، بۇرعىلاۋ ماشينالارى جانە باسقا دا قاجەتتى قۇرال-جابدىقتار تۇركياعا اتتانۋدا»، - دەپ جازدى ءۇندىستان سىرتقى ىستەر مينيسترلىگىنىڭ رەسمي وكىلى اريندام باگچي Twitter- دەگى رەسمي پاراقشاسىندا.
Indian Express باسىلىمى ءۇندىستاننىڭ تۇركياعا ارنايى دايىندالعان قىزمەتكەرلەردەن تۇراتىن ەكى ىزدەۋ-قۇتقارۋ توبىن جىبەرگەنىن ناقتىلادى.
تۇركيانىڭ ءۇندىستانداعى ەلشىسى فيرات سۋنەل ءۇندىستان ۇكىمەتىنە كومەك ۇسىنعانى ءۇشىن العىس ءبىلدىردى.
TheHindu.com اقپارات اگەنتتىگى سيرياعا كومەك جونەلتۋ ءسال كەشىكتىرىلگەنىن حابارلادى. بۇعان سەبەپ - تەك مەديتسينالىق زاتتارى بار جانە ىزدەۋ توبى جوق C-130 ۇشاعىنىڭ تۇسكە دەيىن كەشىكتىرىلۋى.
كوپتەگەن ەل ۇكىمەتتەرى جەر سىلكىنىسىنەن زارداپ شەككەن اۋداندارداعى قۇتقارۋ جۇمىستارىنا كومەكتەسۋ ءۇشىن قىزمەتكەرلەر، مەديتسينالىق قۇرالدار مەن جابدىقتاردى جىبەرۋدە.
